Hanla u Eugeneson Lyngdoh ym pu pynbna u wa ym yakhun ya ka Election MLA kawa daw man ha u snem 2023 na Mawphlang Constituency, tangwa ka seiñ UDP da dep tip ko ya ini wei katkam wa tip da ong wa neiliang kiwa yahkhmat ka seiñbei da kwah ki dik-dik wow pynyakhun noh da u Auspicious Lyngdoh Mawphlang.
Ya ini i kwah kiwa yahkhmat ka UDP seiñbei da pyntikna leh da u JA Lyngdoh, uwa da pynsñiaw yei wym klam che u khon yong oo wow yakhun na kani ka seiñ toh neidaw wa kiwa yahkhmat da kwah bait ki ya u Auspicious Lyngdoh Mawphlang wow pynyakhun kam u kyrtong ka UDP ha kani ka Election MLA na Mawphlang.
“Nga da khyrngiat O wow yoo yei mih khubor wa neidaw wa u JA Lyngdoh da psiah u cha ka Congress, da booh hei eh ya u khon yong nga won wow yaleh na ka UDP,” da ong u JA Lyngdoh deiwa ong wa ini toh iwa bakla chiboon.
“Hadien wa nga da mih noh O na ka BJP, chi bnai da chong hi-eh O kamtu khlem pynyabi cha kawon kawon ka seiñ wei ha kini ki sngi da em ki khynroo na Mawngap Marbisu kiwa da pynsñiaw yei kwah u khon yong nga wow yakhun na ka UDP ha ka Election MLA na Mawphlang, hawa nga da ong O wa lada kwah sakhiat ki ya u khon ym em iyi iyi i eh,” da ong u Lyngdoh hawa klam wa uwa thoh khubor.
“I yong sakhiat man i kamwa da dep klam nachwa, hadien wa nga da mih na ka BJP, ym em chim O ya kawon kawon ka rai wow lai pynyabi cha kiwi won ki seiñ iwa da chimpor hadooh chi bnai tam wow chong wow pyrkhat lada u mih yakhun biang namo wow chong-ngiah noh,” da ong u.
Chooh chooh u JA Lyngdoh da ong u wa du hadien ar sngi wa da mih na ka seiñ BJP, da em wa Phone na kiwa yahkhmat ka TMC wa Congress tangwa ym em rai jhan wei da paan por chwa wow bichaar bniah bha.
“Ha i por wa ym pu psiah cha kawon kawon ka seiñ, nga da klam che wa lada ki UDP ha Mawphlang kwah ki ya u khon yong nga, toh u pynyoo ki wa ki paidbah leh toh u e kyrchaan pura wei toh u wan da ka luti ym toh wow khut hi-eh kamtu, wei nga da e yumut O leh ya ini cha kiwa yahkhmat ka UDP ha Mawphlang tangwa ym poi cheiwon cheiwon leh,” da pynrap biang u JA Lyngdoh.
“Iwa sñiawdiaw ware toh wa ya ki khon yong nga klam ki katwa ya nga won ym em wa kynjoh ktien wei ha kini ki chi bnai wa nga da chong khlem seiñ, ym em uwi leh uwa yahkhmat ka UDP wa klam næ khut wow ya krehlang biang neibynta wow pynkhlan biang ya ka seiñ, kamtæ ini i khut ya u khon yong nga toh i khut sakhiat næ iwa khut kamtu hi-eh,” da ong u Lyngdoh.
Da khana u leh wa uwi na kiwa yahkhmat na Mawphlang da ong u wa kwah ki wow pynyakhun da u khon yong oo, tangwa hawa da kylli iyi kwah won da ka UDP seiñbei, i jubab kawa da yoh da ong ki wa lada u MLA wa katni ym bien u, ki kwah ki wow khut wei pynyieñ da u Auspicious na Mawphlang, “Kamtæ mar da sñiaw ya ini, da sangeh noh wow lai chakhmat wei da rai wym lai uiñ de cha kai ka Party,” da ong u.
Katkam ka yutip wa da yoh da ong wa ini i psiah u JA Lyngdoh cha ka Congress da e mynsien bha ya ka seiñ ym du ha North Shillong tangwa ha ka jylla hi neibhah da man u u bru uwa da ih bha ha ka saiñ pyrthai wei da jooh man u kam u MDC ha ki snem wa da lai na ka Congress.
Hawa yatoh wa i jied ya ka Congress, u JA Lyngdoh da ong u wa hanla kiwa boon da klam ki wa kani ka Party katni da hiar ko, ym em ko ya kiwa mihkhmat tangwa ki paidbah toh u sñiawthooh ki wa u MLA lane MDC ye ki wow mih na ka seiñ, tangwa ki paaid wa jied wa kyrchaan ya ka Congress u em bait ki, hanla da em ki kattu katni kiwa mihkhmat wa da mih tangwa ym toh waroh.
