Ka VPP Khliehriat Circle lyngba u President yong ka, u D.L. Rymbai da pyntip u wa hadien wa da dep chimkhia nadooh ki seiñbhalang, ka synjuk ki waheh chnong, ki seiñ kiwa kamai kari, kiwa mihkhmat paidbah wow lai ood cha ka sorkar yow pynchna noh ya u sarok NH-6 tangwa ka sorkar ym bna ko wow leh iyi iyi hadooh katni, neiliang ka Party u pynman ko da ka yalang paidbah hajrong ini.
Da ong u wa uni u sarok da em ki bynta wym hoi de tang u lai kari khamtam ha ki thaaiñ Narpuh wei ha Khliehriat leh da man u uwa sih wei uwa da booh hei maa ya kiwi lai wa wan neidaw sied ki moo i khyndaw manda ksaaid ki kari manda sahkut ki.
Hajrong ini da ong wa ka Party da khut ko wow pynman da ka yalang paidbah ha ka 18 tarik uni u bnai ha Teilang Playground, Dkhiah West heipor 11:00 waje i step.
Kamtæ da khut ya kiwa yahkhmat ki seiñ saiñhima, ki seiñbhalang, ki seiñ khynroo, ka synjuk ki waheh chnong, ki seiñ kamai kari, ki seiñ manbei wa ki bru samen kiwa em yei kitkhlieh neibynta i bha i miat wow sñiawbha ki wow wan cha kani ka yalang yow pynbait ya ini i kaam wa da ktah ya waroh kiwa chong chnong ka District kamjooh ya kiwi kiwa na baar ka jylla.
Da ong u leh wa kam ka Party kamjooh kiwa mihkhmat paidbah ymtoh iwa phær næ wow tieñ ki wow pynman yei yakhih lada ka sorkar ym ye ko wow leh yei kaam yong ka khamtam hawa yatoh wa kam kini wa da ktah ya ka khayi pateiñ wa i yap i im.
Discussion about this post