Ka chnong Panaliar, Jowai khutlang ko ya waroh kiwa najan najngai cha ka “Syntu Ksiar Musical Festival” yong ka, ka wow man ha ka 3rd April 2021. Deiwa yooluti wa i wan yong phi ki lok ki jor, u pynman ko ya katai ka Festival kawa jop, weiwa phooh waphieñ.
Kam i pyntiplang ya waroh, wa ka chnong Panaliar ha katai ka sngi, u chim ko ya ka bai psiah cha Pynthorwah ya waroh kiwa lai wawan cha kitai ki thaw khlem em i maap nadooh ki kari hadooh ki bru. Ya ki kari, ye phi u pynyieñ chajan ka thaw man ka Festival nadooh Luti Chyrmang chadooh chajan Mot Kiang Nangbah, deiwa kyrpaad ya waroh kiwa wan dei kari, wow sñiawbha phi u yakrehlang wa ki Volunteers Home Guards ki wow pynlai pynwan ya ki kari ha waroh chilynter, khnang wow lait nei sahkut chithawdon lane wow pynsep-ai yeipor yong i dæ.
Neitæ won, heiyatoh wa ki yalehke yong ki khynnah u sdang nadooh i 10:00 waje i step hadooh ka 4:00 waje i janmiet; ki dukan baam wa kiwi ki jait yalehke leh u sdang ki heijooh hi i por katwa ka tem ka put u kut ko heipor 10 waje i miet,. Chiboon ki jait baam jait dih u yoh phi, manda poi phi heitai, katwa kamtæ, ymchah ya kiwon kiwon ki baam ki dih kiwa thied phi na lait u rah chapoh ki bynta katai ka Musical Festival. Daw em ki wow talasi, yoh u lait u sep-ai ki yongphi, sñiawbha hamrah de; yakreh lang wa i pynlai ka chnong nadooh ki thawpsiah hadooh wa mih kylla phi; khnang wa kitai ki thmu wa bha ka chnong yoh u man ki kiwa laibait wei wajop.
Ka chnong hi waroh kawi, pyn-eh ko yaka bok ka nasib yaphi waroh ki wow wan cha katai ka Syntu Ksiar Musical Festival, yoh phi u man kiwa chait wa tram ha waroh ki liang dei kyrkhu yong u Blai.
Ka Wyrta na u Riquoma Rq. Laloo, Waheh Chnong, Panaliar Jowai.
