Ka Seiñ Raij Tuber da khut sñiawbha ko ya phi waroh ki lok ki jor, ki kha ki man, ki kur ki jait wa em hapoh ka jylla kamjooh kiwa cha baar jylla cha ka Behdieñkhlam Festival 2026 kawa daw pynman nadooh ka 14 tarik hadooh ka 17 tarik u July, 2026 ha Tuber Kmaichnong kawa em ha East Jaiñtia Hills District.
Ka 17 tarik toh ka sngi pynkut heiwa u Chief Minister ka jylla, u Conrad K Sangma daw wan u kam u kongsan deiwa emlang u Deputy Chief Minister, u Sniawbhalang Dhar kam u symbood kongsan deilang kiwi de nadooh ki Montri sorkar, ki MLA, ki MDC, ki sahep sorkar wa kiwi kiwi de ki bru bna naam bna pyrtuid ka jylla yong i.
Da pyntip leh cha phi ki khon chong bri chong khyndaw yong ka Seiñ Raij Tuber wa ha ka sngi Musiang ka 16 tarik, ka Rah Bhang ki Phang Neiñ u rah ki na ka chnong Myrjai, West Jaiñtia Hills District wa ki Phang Wah won u rah ki na Mynsdier Wah Saphoh hapoh u pood u ang ka chnong Tuber Kmaichnong.
Kamtæ ka Seiñ Raij Tuber da khut sñiawbha kyllumlang ko ya waroh ki khon ka Bri U Ynñiaw Trep Ynñiaw Skum wow wan sakhi ya kani ka lehñiam Behdieñkhlam kawa heh tam hapoh ka jylla Meghalaya.
Ha iwi won i liang da pyntip wa da booh kyndon neibynta kiwa wan chongdai ha ka 17 tarik kamwa da jooh leh man-u-snem neibynta u suk kiwa lai wa wan heiwa ka Seiñ Raij Tuber hei ya krehlang waka Dorbar Chnong Tuber Kmaichnong da khang pyrchah ko ya kiwa dai kiad, kiwa muaid kiwa wan leh khlem akor wa kiwa klam sih klam sang.
Da khang pyrchah leh ya kiwa wan chongdai ha rood sarok nadooh wa psiah cha ka chnong Tuber Kmaichnong hadooh wa poi cha Biar Aitnar.
Kiwon kiwon kiwa kwah wow wan chongdai toh u yoh bor chwa ki na ka Seiñ Raij Tuber wa ka Dorbar Chnong Tuber Kmaichnong khnang yow ye u pynyoo thaw ya kiwa kwah u dai ha i thaw wa da booh kyrpang kamjooh ki sngi.
Yow tip bniah ye wow Phone ha ini i Number-8731065403.
Discussion about this post