Ki pulit da pynngat ki hapoh ka aiñ POCSO ya uwi u Nurse chynrang uwa na Rajasthan uwa kreh ha NEIGRIHMS hadien wa chah pynbaad wa jrong kit u ya kawi ka khynnah kynthai kawa dang 15 snem i rta kawa chah pooid Appendix ha ka 4 tarik uni u bnai.
Hawa pyntip yeini, u Superintendent of Police ka East Khasi Hills, u Vivek Syiem da ong u wa ki pulit dadep ki wow phah pyntip cha NEIGRIHMS hajrong ini wa jia wei daw phah leh cha yung kasari mynstep ka sngi.
Da ong u wa ini wa jia toh ya ka khynnah wei da emkaam wow e Notice chwa hapoh ka kyndon 33 yong ka BNSS wei ya ka Report daw phah cha NEIGRIHMS yow leh ko iyi iyi pyrchah ya uni uwa chah pynbaad.
Ynne ka sngi, neiliang ka KSU leh da lai ko wow e dei thoh ha u SP yow dawa pynchitom ya uni u Nurse uwa na Rajasthan.
U SP da pyntip u wa ya kani ka Case da chim kam ka Special Report Case, wei hapoh ka 60 sngi daw e kti ya ka Chargesheet katkam ki sabut wa da yoh u pynlang pynlum.
Ka KSU da ong ko wa kani ka khynnah hadien wa dep ko u chah pooid da booh ka ha iwi i kamra khlem em wa pait wei da wan uni u Nurse uwa da leh yeiwa leh u wei kani ka khynnah neidaw wa tlot hadien wa chah pooid ym ye ko wow kbai wow kiad. Hadien wa rah ka cha ka Ward, da khana ko ya ka bei ko yeiwa jia heiwa da lai ko wow booh FIR ha Mawdiangdiang Outpost ha ka jooh ka sngi.
Ka seiñ da pynbaad ko wa ki pulit ym em leh ki iyi heiwa da takit ki du hadien wa tuklar ka seiñ wei itæ hadien 48 kynta wa yoh ya ka FIR wei ym em leh kem ya uni u Nurse hadooh wa hap ka yung ka sem wow booh sa kawi ka FIR.
Chooh chooh da ong wa ki Nurse chynrang kiwa em ha NEIGRIHMS kiwa boon toh kiwa na Rajasthan wei da pynyoo ki yei kyrchaan ya uwa chah pynbaad heiwa da pynman yakhih ki hakhmat ka yung krehkaam u Director kani ka thaw ha ka 7 tarik.
Ka seiñ da dawa ko leh wow kem noh ya uni u bru.
Discussion about this post