Ka Seiñ Raij Tuber kamwa jooh leh man-u-snem hachwa wow hiar rep hiar riang cha ki hali hator ki lyngkha ki risa, daw pynman ko yaka Chaad Suk-Kara myntu u snem haka 6 tarik uni u bnai ha Biar Blai (Aitnar) ka Seiñ Raij Tuber ha Tuber Kmai Chnong. Ha Kani ka Chaad Suk-Kara daw wan ya chimbynta kamwa 30 tylli ki Seiñ Raij Chnong waphær waphær kiwa em hapoh ka Raij Tuber.
Neidaw wym ye u kiar wa pynthut u slap da kyrriah thaw ya kani ka Chaad Suk-Kara kawa jooh man ha Moomalang (hajan Khloo Blai) cha Biar Blai (Aitnar) kawa em hapoh chnong Tuber Kmai Chnong neibynta myntu u snem donhi khnang yow pynsuk yaki paidbah heiyatoh waka luti syngkieñ.
Ya kani ka Chaad Suk-Kara da jooh pynman yaka haka sngi Pynsiñ yong ka tayaw wa nongkong chi sngi hadien wa pyndep u Langdoh waki Wasan Raij Tuber yaka Kñia Ryngkaw (Sang Sngi) haka sngi Hat.
Kani ka Chaad Suk-Kara lai lang ko leh chirup chirup waka niam ka rukom yow chaad pynemburom yaka Bei Rymaw Rymchi kawa hajrong i tympha tyrpeiñ i doh i pran yong ka da e sñiawbha ko ya u Khon Ñiaw Wasa Wasung, i baam i dih, u soh u pe, i that lieh that soo, ka um ksiar um rupa, ka la-ær wabang wathiang. Hajrong ka snieh ka swor yong ka da yoh i u chna yung chna sem u kaap u lai u imsuk imsaaiñ.
Kam chibynta leh u e ngooh e dem ya U Trekirot Kynrad wa booh wa thoo yow yoh dei chait dei tram wa sarot tam. Yow roi parum pareh yow skem u chrot u tnoom, u pangboh pangyar, yow roi u saikhrong saitri, yow roi i jait i kynja, u kñi u kpa. Yow mih ki piar ki khai, ki kajai ki myntoi, ki myntri ki santri napoh ki trip ksiar trip rupa da kiwa bang thylliej bang sabar hakhmat ka yaaw ka haat, ka dorbar sorbar wow yasait yada yaka Raij ka muluk, daw ye u wai kot wai sla. Yow manbha manmiat laha ki thung ki tep, khayi khaba, hei puræ puthi.
Chibynta u man ko leh yow pynskem yaka niam ka rukom ka riti dustur la hei riam hei bait, i rwai i siaw, hei put hei tem, hei chaad hei kmen kiwa da yoh pateiñ naki ma ki woh, ki bang kili nadooh hyndai hynthai da lung ka sngi u bnai ha i ki pateiñ kiwa katni yow pynskem yei yong-i-dahi.
Kat wym pu dep u Langdoh waki Wasan Raij yaka Kñia Ryngkaw wym ye u pynman yaka Chaad Suk-Kara. Chwa wow sdang ka Chaad Suk-Kara haka step pynsiñ, u Langdoh waki Wasan Raij pyndep ki yaka Chaad Thoh (Pynhap Symbe).
Katwa kamtæ dei mynsien wa sñiaw ka-it kasar wei maya khutlang ya phi nadooh ki khon ka Seiñ Raij chnong waphær waphær hapoh ka Raij kamjooh ya ki chnat Seng Khasi, Seiñ Raij waphær waphær hapoh ka Bri u Ynñiawtrep Ynñiawskum wei kamjooh leh ya ki paralok naka kynhun Balang waphær waphær cha ka Chaad Suk-Kara yong i.
Ka kyrwoh Wyrta na u Waheh R. Harvis Phawa, Rangbah Mansan (President) ka Seiñ Raij Tuber.
Khublei khublei khublei Chaad Suk-Kara wasuk wakmen ya phi waroh u Trekirot dei kyrkhu kyrdoh.
