Ha rood ka yalang ka G7 Summit ha Italy, u Prime Minister Narendra Modi da khut sñiawbha u ya u Pope Francis wow wan u cha India.
U Narendra Modi da ong u wa burom wei yaroh u ya u Pope Francis ya ka thong u wow chakri paidbah wei wow pynman ya ka Pyrthai kawa miat wa bha yow im ki bru.
U PM Modi da yachem u wa u Pope Francis hawa poi ha kani ka Summit hadien wa pdiang sñiawbha ya oo da ka PM ka Italy, ka Giorgia Meloni heiwa ka India man ko kam kawi na ki ri wa da chibynta ha ka ‘Outreach Nation’ kani ka G7 Summit.
Ha ki dur ki dar wa da mih, u Modi da yoo wa ya kdung u wa u Pope Francis.
Neiliang u Archbishop ka Cuttack-Bhubaneswar wa Bhubaneswar St. Vincent Catholic Church, u John Barwa da pynsñiaw u yei kmen wa u Modi da yachem u wa u Pope Francis ha kani ka G7 Summit ha Italy, deiwa ong wa kani toh kawa daw kynmoo yanom hapoh ka ri iwa daw ktah leh ya ka ri deiwa bha.
“I ong i wa ini i yatoh u PM i wa u Pope daw pynyajan, wei kmen i leh wa u Prime Minister i da yachem u wa u Pope,” da ong u Barwa.
“Ini daw kynmoo yanom i ya i kam ki Christan wa em ka laad wow im dei suk hapoh ka ri wei u ya krehlang i wow yoh i hok deiwa im suk hapoh ka ri,” da ong chooh chooh u Barwa.
U Modi hawa chimbynta ha ka G7 da yaklam u heiyatoh waka Artificial Intelligence, i pyndap pynbiang yei bordiñ kamjooh yeiwa emkaam ka Africa wa ki thaaiñ Mediterranean.
U Modi da yachem u leh wa u President Emmanuel Macron ka France, u Prime Minister Rishi Sunak ka United Kingdom wa u President Volodymyr Zelenskyy ka Ukraine.
Discussion about this post