December 21, 2020

Khut sñiawbha u SP ka West Jaiñtia ya ki khynnah ka SD Convent yow lehkmen Christmas

by Wyrta Staff

Advertisement ad1

Ynne ka sngi man ko ka sngi wow sah kynmoo ya ki 10 ngut ki khynnah (kiwa hapyrdi 5-14 snem i rta) na ka Children of SD Convent, Sahsniang neibhah wa man ko ka sien wa nyngkong ya ki wow yoh ki u wan cha Jowai dei chimkhia ki pulit ka West Jaiñtia Hills hapoh i yahkhmat u SP yong ka, u Bikram D Marak.

Kani ka Convent toh kawa ri wa sumaar ya ki khynnah na kylleiñ ka Ri-loom Jaiñtia hadien wa ym em wa pait ya ki wei ini i wan yooh kjat ki cha Jowai toh katkam ka thong krehkaam ka Ministry of Home Affairs (MHA) ya kawa tip kam ka “Visit My Police Station” ya iwa da pynkrehkaam nyngkong dooh hapoh ka District.

Ini i thong ka MHA toh wow wanrah i yajan hapyrdi ki paidbah wa ki pulit kamjooh leh wow pynwiar ya i tieñ wa jooh em ki paidbah khamtam ki khynnah ya ki pulit.

Ki pulit ka District hapoh i yahkhmat u Bikram D Marak wei i yah luti u MC Marngar uwa man kam u DSP (Headquater) wa ka CW Lyngdoh kawa man kam ka DSP (Crime) da pynkhreh ki yei wan kini ki khynnah.

Manda poi ha Jowai ya kini ki khynnah da yah ya ki wow lai paitke ki ya ka Jowai Police Station, ka Women Police Station wa ka Jowai Traffic Branch heiwa da batai da pynyoo ya ki kammon i rukom krehkaam kini ki chnat krehkaam ki pulit, da pynyoo ya ki ya ki Control Room, ki Lockup wa kiwi kiwi ki thaw wei neini da yahke ya ki cha Syntuksiar wow kyndehke ki.

Neini da yah ya ki cha ka yung krehkaam u SP ka District heiwa da pynyoo ya ki ya ki kamra ki DSP wa u SP wot hadooh da chah ya ki u chong ki ha ka chuki yong oo (SP).

Ha ka Conference Hall ka yungkrehkaam u SP da pynman ya ka ‘Gift Exchange’ kam chibynta yong ka Pre-Christmas Celebration.

Neiliang u Bikram da ong u wa heipor wa yaklam wa kini ki khynnah ynne da khana ki wa ynne dap ki dei sñiawkmen ym du wow yoh u wan yoo ya kini ki yung krehkaam ki pulit tangwa ynne man ko ka sngi wa nyngkong dooh wa wan ki cha Jowai kawa man ka chnong wa jooh sñiaw ki du hei pyrtuid donhi.

Chooh chooh da ong u wa ha kani ka sngi da pynman leh dei thmu wow pynchlur wei wow emynsien ya ki wow man ki ki khynnah wa minot.

Heiyatoh wa i angnood wow pynman ya kam kani ka programme, neiliang u Bikram da ong u wa neidaw wa em kani ka khlam COVID-19 ymye ware u pynman ya ka tangwa da kyrmen u leh wa ha u snem wow wan daw ye u yah ya ki khynnah ki skur waphær waphær.