15 49.0138 8.38624 1 0 4000 1 https://wyrta.com 300 0

Khut u Modi ya ka ri wow man kawa yatylli hadien wa pynmih ka Supreme Court yaka rai heiyatoh waka Ayodhya

0 Comments

Jowai: Ynne ka sngi hadien wa ka Supreme Court da e ko yaka rai wow pynksan ya ki Hindu wow chna yaka Ram Mandir heithaw wa em ka Babri Masjid ha Ayodhya, Uttar Pradesh kawa ha u snem 1992 da chah tympra ko iwa da yah cha i mynsoo mynsnam hapoh ka ri heiwa palat 2000 ngut da dooh ki yei mynsien, ha kani ka rai ka Supreme Court da e leh da iwi i thaw wa heh 5 Acre ya ki Muslim yow chna ki yaka Mosque.

Kani ka mukotduma toh kawa da sdang nadooh u snem 1950 hadien wa em wa booh da ki blai Hindu hapoh ka Babri Masjid heiwa ki Hindu da kam ki wa ini i thaw wa em kani ka Masjid toh i thaw wa kha ya u blai Ram ka niam Hindu.

Ka rai ka Supreme Court kawa jrong hadooh 1,045 sla da ong ko wa katkam ka Report ka Archaeological Survey of India (ASI) wa em ki dak ki chin wa pynyoo wa nachwa em ka yung kawa ymtoh kawa man Islamic hei rukom chna.

Haka 30-09-2010, ka Allahabad High Court da pynmih ko yaka hukum wa ya kani ka thaw wa ya kajia toh u yabhah ka ha ki le tylli ki bynta hapyrdi ki Hindu wa ki Muslim tangwa ym hun ya kani ka rai wei da rah yaka chaka Supreme Court.

Heiyatoh wa ini, u montri rangbahdooh ka ri u Narendra Modi hawa e u yei klam cha ka ri ynne ka sngi da ong u wa ynne ka sngi ka Supreme Court da e ko yaka bichaar hajrong ka phang wa emkaam bha kawa da neh kattu da boon phaw snem.

Da ong u wa waroh kawi ka ri da pdiang ki ya ini i rai ka Supreme Court iwa pynyoo yei yatylli ka ri deiwa ong leh wa kani ka sngi toh ka wow sahkynmoo ya i rukom e bichaar hapoh ka ri heiwa ka Supreme Court da ap da sñiaw ko ya waroh chwa wow e ko yaka rai wei emkaam wow yaroh yaka neibhah ini ym toh iwa suk wow leh.

Da pynkynmoo u leh wa ynne ka sngi haka 09-11-89 da tympra ya ka chram wa tip kam ka Berlin Wall kawa yabhah yaka ri Germany heiwa ki ar jiat ki rukom pyrkhat da man ki kam kawi wei ha India ynne ka sngi da wai leh yaka Kartarpur Corridor hapyrdi ka India waka Pakistan.

Da ong u leh wa i rai heiyatoh waka Ayodhya da pynyatylli ko ya i kam ka ri wei lada dang em kiwa em i sñiawkthang wow mylliñ noh ki neibhah haka India wa thymme ym thaw ya i mynsien wow im dei tieñ, i kthang wa i pyrkhat sih.

Chooh chooh da ong u wa ka Supreme Court da pynyoo ko wa iwon iwon i kaam wa eh dooh leh ye wow pynbait ki katkam ka aiñ.

Da pteiñ u deiwa ong wa kani ka yaknieh thaw ha Ayodhya da ktah ko ya kiwa boon ki juk wei toh u chim ki yaka rai wa ki juk wow wan u yaleh ki wow chna yaka India wa thymme da i mynsien wa chngaiñ.

Kamtæ da khut u ya waroh wow yakrehlang wow chna yaka ri India wa thymme deiwa em i chaniah wei ym toh u ieh ya uwon uwon chadien hawa lai chakhmat.

0 Comments

Leave a Reply