Khut yachem kiwa yahkhmat Balang yaki heh seiñ saiñpyrthai yow lait nei baam tooh

Ka Khasi Jaiñtia Christian Leaders Forum (KJCLF) da khut ko yaka yalang wa kyrpang ya waroh ki seiñ saiñpyrthai kiwa em ha ka jylla, wei ha kani ka yalang dapoi kiwa yahkhmat yong kiwa boon ki seiñ saiñpyrthai, lait noh naka NPP.

Hawa klam hadien ka yalang, u President ka KJCLF, u Bishop Purely Lyngdoh da ong u wa i khut ya ka yalang toh wow pynsñiaw yei sñiawkhia yong ki paidbah neibynta ka jylla hakhmat kiwa yahkhmat seiñ saiñpyrthai.

Da ong u wa neiliang ka Forum da pynsñiaw wa kam kiwa mihkhmat toh u pynemkaam hok ya kayi kawa u Blai da e u ha ki, neibhah ka mynried ka jylla chong ko ha kti yong ki. Da ong leh wa ka Forum da kyntu wei booh ko hakhmat kiwa yahkhmat wa toh u pynlait ki ya idæ nei baam tooh wa da pynsih pynpra ya ka imlang sahlang.

U Bishop da ong u wa i jied ya kiwa yahkhmat chong ko leh ha ki paidbah wa ha iwon i rukom u yarap ya ki yow poi cha ka thong, neibhah boonsien kam ki paidbah ki hap ki wow kdaw kti ya kiwa yahkhmat.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Ha kani ka yalang wa da khut da ka Forum da lai wow emlang da uwa yahkhmat ka Liang Pyrchah, u Dr. Mukul Sangma, u Charles Pyngrope kiwa naka AITC, u AL Hek naka BJP, u Adelbert Nongrum yong ka KHNAM, u KP Pangniang yong ka HSPDP, u Jemino Mawthoh naka UDP wa u Auspicious Lyngdoh naka PDF.

Neiliang u Dr. Mukul Sangma uwa man leh u Montri Rangbah warim, da ong u wa ka luti wa chim da ka Forum man ko kawa emkaam bha ha ini i por, wei kam kini ki ya phyllu yumut daw yalap wei daw pyntikna wow yoh yaka mynried ya kiwa chong chnong wow sñiaw sarong ki, neibhah kam kiwa yahkhmat ka saiñpyrthai kiwa da chim yei kitkhlieh ya kiwa ki paidbah da yooluti ki, emkaam wow sñiawthooh yei eh wa ki leh em ki hakhmat yow tei yaka jylla ha ka kaam synchaar khadar.

Da ong u wa kiwa yahkhmat ha ka saiñpyrthei ki emkaam ki wow em kiwa paitbniah ya ki wei wow chah bichaar ya iyi wa mut ki u leh, wei da ini i daw ye u kreh ya ki kaam wei wa man ryngkat wa iwa yooluti ki paidbah.

Hajrong i kwah kiwa yahkhmat niam wow lait nei baam tooh, u Dr. Mukul da ong u wa emkaam yaka sorkar wow lait ko nei baam tooh neibhah daw pyntikna wa ki kaam pynroi wa i roi u em i ha waroh ki liang yow wanrah won ya ka mynried wa chngaaiñ neibynta ki mandien deiwa pynrap wa kani man ko kawa emkaam wa kiwa wan hadien wym chah ktah ki nei baam tooh.