Ka Joint Action Committee (JAC) kawa man ka satri ki seiñ wa kynthup wa ka Jaiñtia Hills Truck Owner Association (JHTOA), Meghalaya Truckers Union (MTU) wa ka Jaiñtia Hills Clinkers and Cement Association (JHC&CA) da khut ko ya ka yalang paidbah wa kyrpang ha ka 17 tarik uni u bnai.
Ya kani ka yalang daw pynman heipor 1:00 i sngi ha Phramer, West Jaiñtia Hills heiwa daw yaklam hajrong ka phang dawa ka JAC iwa kynthup wow pynthymme ya i dor bai kit mar katkam wa da pynmih da ka sorkar jylla ha kini ki sngi wa dadep.
Da pyntip leh wa ya kani ka yalang daw pynman ya ka katkam ki kyndon wa da booh ka chnat i chait i khiah ka jylla hei wow yada wei wow yakhun ya ka khlam COVID-19.
Kani toh katkam ka Wyrta wa da phah da u Publicity Secretary ka JAC, u J. Shylla.