Shillong: U montri rangbah ka jylla u Conrad K Sangma ynne ka sngi da pynman u yaka yalang deiwa khut lang ya waroh ki Party yow ap yei sñiaw yong ki heiyatoh waka Citizenship Amendment Bill (CAB), 2016 kawa da thooh laad wow pynman tre ri ya kiwa wan na Bangladesh, Pakistan wa Afghanistan.
Hadien ka yalang, u Conrad da pyntip u cha kiwa thoh khubor wa i thong kani ka yalang toh wow ya sñiawthooh ya iwon wa mynjur lang wa kiwon ki bynta wa pyrchah.
Da pynkynmoo u leh wa ka Meghalaya Democratic Alliance ka pyrchah ko yaka CAB, deiwa ong leh wa ya kani ka yalang da pynman katkam wa da kyntu u Union Home Minister u Amit Shah, uwa da ong wa emkaam wow sñiaw ya waroh ki seiñ saiñ pyrthai.
Chooh chooh da ong u wa yooluti u wa ka sorkar pyrdi leh daw wan ap ko yei sñiaw yong kiwi leh ym du ya ki seiñ saiñ hima. “Ka Delhi katni sñiawthooh ko wa waroh kawi ka thaaiñ mihsngi pyrchah ki yaka CAB kamtæ da ong to yaklam chwa i yow sñiawthooh ko iyi wa wit i,” da ong u Conrad.
Ha kani ka yalang, kiwa boon da kylli wa iyi wow jia yaki aiñ kiwa da em katni nadooh i rukom krehkaam ka Sixth Schedule, ka Meghalaya Residents, Safety and Security Act, 2016 wei lada daw im ki hadien wa pynkrehkaam yaka CAB.
“Da kylli ki leh ya ki laad ki luti wow yada ya ki paaid ka thaaiñ mihsngi,” da ong u Conrad.
Heiyatoh won wa i pynkylla yaka Sixth Schedule, ki seiñ saiñ hima da pynsñiaw yei sñiawkhia wow yoh wow thung (Nominated) MDC ya ki jaitbru ri-loom kiwa ym yohlaad wow mihkhmat (Unrepresented Tribes) ha ki District Council.
U Conrad da ong u wa ya ini, ka sorkar jylla da klam che ko heiwon yieñ ko wei da pyntip leh cha u montri ka DCA u James K Sangma uwa da em ha New Delhi yow pyntip u cha ka sorkar pyrdi yei pyrchah ya ini wei yow pyndam noh ya i ktien Unrepresented Tribes.
Discussion about this post