Ka 5-Sutnga-Saipung Block National People’s Party (NPP) ha ka yalang kawa man ynne ka sngi ka 28 tarik ha chnong Sutnga da yoh wow pdiang burom ya kiwa kitkaam yong ka United Democratic Party (UDP) Saipung Circle wa ya u Moya Darnei uwa man u MDC warim ka Congress na Saipung Constituency kiwa da pynyabi ya idæ cha ka National People’s Party (NPP) hapoh i yahkhmat u Zosiama Thianglai uwa da jooh yaleh MDC na Saipung Constituency wei uwa da wan hei wa ar ha u snem 2019.
Kiwa kitkaam yong ka UDP kiwa da psiah cha ka NPP ynne ka sngi man ki kamni:
- President: U Kungliana Darnei
- Vice- President: U Thianga Nampui
- General Secretary: U Sangpuia Nampui
- Asst. Secretary: U Lalrama Nampui
Adviser:
- U Zosiama Thianglai
- U Rev. Neichonga Nampui
- U H.W Fowler Darnei
- U Lalchonga Nampui
- U Lalremzoma Nampui
- U Ngailiana Thiate
Ha kani ka sngi, u Moya Darnei uwa man u MDC warim ka Congress na Saipung Constituency leh da lai psiah u cha ka Party NPP ryngkat wa kiwa kyrchaan yong oo.
Waroh kiwa psiah ynne ka sngi cha ka NPP da khana ki wa kwah ki wow kyrchaan ya ka NPP wa ya ka Santa Marry Shylla ha ka Election MLA 2023 neibynta wow wanrah yei roi i paar hapoh ka Constituency wa ya ka thaaiñ Saipung kawa da chah iehbeiñ ha kini ki 15-20 snem wa da dep.
Ha kani ka sngi da synraan lang ya kini kiwa yahkhmat ka thaaiñ Saipung da kiwa kyrchaan kiwa wan da ki spah ngut.
Da pynlai ya ka yalang da ka Santa Marry Shylla kawa man leh kam ka President yong ka NPP 5-Sutnga-Saipung Block kawa man leh heijooh i por ka kyrtong na kani ka Constituency.
Da ya emlang leh ha kani ka yalang wa ki bru wa paawkhmat kani ka Constituency kiwa kynthup ya u Seibor Shadap MDC ka Sutnga-Narwan Constituency, u Joirinwel Pyrtuh MDC warim ka Bataw-Lakadong Constituency, u Thomas Nongtdu Nominated MDC warim ka JHADC, u Bankupar Sutnga Acting Dolloi Sutnga Elaka deilang wa kiwa yahkhmat ka Party NPP nadooh ki Unit ki Circle wa kiwa yahkhmat ka East Jaiñtia Hills District NPP leh.
Ha kani ka yalang da wan chitrhem leh ki Waheh Chnong, Secretary Chnong waphær waphær kiwa em hapoh ka Sutnga-Saipung Constituency wa ki paidbah wa kyrchaan borbah ya ka Santa Marry Shylla kama ka kyrtong ka NPP na ka 5-Sutnga-Saipung Constituency ha u snem 2023.
