Ka sorkar jylla ynne ka sngi da ekti ko ha uwa bichaar wa da chong-ngiah yong ka Madhya Pradesh High Court, u (Rtd) Justice Mool Chand Garg, wow yahkhmat ya ka dhab takit hajrong i pynbaad baam-tooh ya u khoo ka chnat Social Welfare ka jylla Meghalaya ya uwa da yoh kem da ki pulit ka Boko, Assam ha u Naiynru uni u snem.
Hawa pyntikna yeini, neiliang u montri ka chnat Social Welfare, u Kyrmen Shylla da ong u wa ka sorkar da thung ko ya ka dhab wa laitlooid wei ya i pynbna da pynmih ha ka 29 tarik u bnai wa da dep, heiwa da e por ya ka dhab wow pyndep ko ya ka takit hapoh 3 bnai donhi.
Da ong u leh wa katkam wa pynbna ka sorkar, i takit u man i hajrong i ekti ya u khoo cha ka Continental Milkose neibynta ka Scheme Supplementary Nutrition Programme (SNP) ya uwa da yoh ksoh da ki pulit ka Boko, Assam wow takit hajrong i poi ki marbaam wa tei ya i doh i pran lyngba ka SNP cha ki khynnah wa chitom wa kamjooh leh cha ki manbei wa pun-khon katkam ka Integrated Child Development Service (ICDS) Scheme.
Chooh chooh daw takit ko leh hajrong i pynpoi ya ki marbaam cha kiwa toh hok lada man i katkam ki kyndon wa da booh ka sorkar hajrong kani ka Scheme.
