Hadien wa ka seiñ Hynñiewtrep Integrated Territorial Organisation (HITO) Jowai Circle hapoh i yahkhmat u President, u Owansaki Paswet wa u Secretary u Deibormi Siangbood nadooh ka 16-12-24 dadep e dei thoh ha u DC warim ka West Jaiñtia Hills District wow pynman noh yaka Exam DSC neibhah katkam wa chem na ki 560 tylli ki kreh namo ki Post wa lait, 481 tylli toh yong ka DSC katwa 79 tylli won yong ka MPSC.
Kamtæ heiyatoh wa ini, ynne ka sngi da lai pynkynmoo ki sa ha u Deputy Commissioner wa thymme ka West Jaiñtia Hills District, u Abhinav Kumar Singh.
Ka seiñ da ong ko wa u DC da khyrngiat u wow tip na ki yei boon kini ki Post wa lait, neibhah katkam i klam paidbah u MLA ka Jowai, ong u wa em 151 tylli ki Post DSC wa lait, wei yeini da pyntip cha oo da u DC wa katni.
Heiwi i liang yaroh ki ya u MLA ka Jowai wa toh na waroh ki MLA ka West Jaiñtia Hills District du oo donhi wa klam hajrong ka DSC, tangwa heijooh i por won pyndiaw ko ya ki kam kiwa kreh yei miat i bha ka imlang sahlang neibhah ki Post wa lait kamwa pynbna u MLA lyngba wa chim yukheiñ u DC man i wymtoh wa du 151 tylli donhi, katwa lyngba ka RTI wa yoh ki ha u bnai November na ka yung krehkaam u DC hi em ki 560 tylli.
Ong haroh ki wa i klam u MLA wa ong u ha u 2021 ya ka LDA da pynman Exam neibynta 54 tylli ki Post wei neidaw wym ye kiwa yaleh kreh u lehbha ha ka Exam, da Pass du 49 ngut donhi, wei ha ki kajiak sngi daw thung kreh noh ki.
Kamtæ hajrong ini ka HITO da kylli ko deiwa ong, ini man i wym sñiawsuk, neibhah hawa ka DSC em hi ko ki kyndon yong ka hawa thap kreh, wa katkam ka bhah namo ka Ratio klam che ko wa kiwa toh u chah khut Personal Interview toh u man ko 1:2 kamtæ lada ong u MLA 54 tylli ki Post wa lait, toh u Pass 108 ngut ha ka Exam.
Wei katkam i pynche u MLA wa ong u 49 ngut kiwa Pass, ymtoh won u mylliñ ya katai ka Ratio wa ong 1:2 neibhah lada 49 ngut kiwa Pass hawa pynchong yurim katkam ka Ratio ye u thap kreh du 24 ngut donhi, ym ye wow Pass 49 wei thung leh pyn 49 ngut, ini toh ka bynta wa ka DSC da booh kyndon ko.
Kamtæ kyntu ki wa lada kwah wow yoh ki bru katkam ki Post, toh u e laad ya kiwa yaleh kreh u thoh Exam ki, neibhah kamwa yoo ki ha u 2019 ya kiwa Fail da e laad biang u thoh ki khnang yow yoh ki ya katai ka Number katkam i em ki Post wa da booh.
Tangwa ong ki sñiawsih won u yoo wa heiwi liang ye u ong bait kani man ko i baamsap neibhah kini ki 560 toh ki Sanctioned Post kiwa da em poisa, tangwa manda ym ye u pyndap ki Post ha kawon kawon ka chnat da thung da Contract Basis hei su wa khian. Ini man i iwa pyntlot yaka imlang sahlang næ ki khynroo khyllood wa da em i puræ puthi wa biang.
Ha kani ka jooh ka sngi ka seiñ da pynkynmoo biang ko leh lyngba ka dorkhat heiyatoh ka rukom krehkaam namo ka Procedure kamwa dadep e heipor wa em u B.S. Sohliya kam u DC, yow man ka Exam DSC kawa khooid wa suba deiwa pynmih ya ki Answer Key manda dep thoh, wei iwi won leh yaka Personal Interview da paan ki 20% wei 80% won toh u wan ko na ka Written Test neitæ u pynmih paidbah leh ya ki Result deilang ki Marks wa ki Roll Number wei pyrtuid yow man ko kawa khooid ka Exam, deiwa yooluti wa ini i dawa yong ki u mankaam ki.
Discussion about this post