U Montri ka chnat Puræ Puthi ka sorkar jylla, u Lahkmen Rymbui hawa e yei klam haka yalang lehkmen Freshers’ Meet ka Kiang Nangbah Government College Jowai wa pynlai da ka Kiang Nangbah Goverment College Students’ Union ynne ka sngi, da khyrngiat u wow sñiaw na u President ka Union, u Precioustar Sten wa hadooh katni kiwa sikai ka Morning Shift ym pu em yoh ki ka tulop wa da pynku wot hawa neiliang yong oo da dep u wow mynjur nadooh u snem 2021.
Ong u wa hei sakhiat hi neiliang yong oo nadooh ka 01-04-21 da dep mynjur u wa waroh kiwa sikai Morning Shift u yoh ki yei su wa T. 15,000 chi bnai.
Hawa kylli u na ka Principal kani ka College khana ko wym em yoh ki kawon kawon ka Order.
Hawa kyruiñ won u chei puræ puthi ong u wa da toh i por u man kiwa pynkhreh ha kani ka juk yakob, wei ong haroh u toh u pyrkhat neibynta ka CUET-PG lada em yumut sakhiat ki u pteiñ yei puræ wa chakhmat.
Da ong u yow jop wei poi cha ka thong emkaam u kreh chitom, wei u chim leh yei eh kam ka laad ka kabu yow ye u lehbha.
Ong u wa i tip i stat wa yoh na ki thaw puræ naka imlang sahlang yarap ko ya ki khon khynroo u yieñ ki hei yong ki hi ki kjat.
Kam kiwa puræ kyntu u wym toh u dooh kyrmen ki neibhah hawa em chiboon ki laad ki kabu, wei boon i wym jooh poi pyrkhat leh wan jia ki deiwa e nongmuna u ya u chyrmit Lakadong uwa mih na kani ka thaaiñ heiwa da chalan cha kylleiñ ka pyrthai dei wym jooh poi pyrkhat wow yoh lang yei tip i stat na soodong ka pyrthai khlem da mih nei thaw wa chong wa sah najrong kiwi won ki laad wym jooh poi pyrkhat u yoh.
U Andrew Shullai, MDC ka Jowai Central kam u symbood kongsan hawa klam da kyntu u ya ki khynroo khyllood wow pynemkaam hok ki yei por, wei i pynman kam kani ka yachemlang wa kiwa wan puræ thymme yarap ko u saam kylliang yei tip i stat.
Ha kani ka sngi da yoh leh i klam naka Principal yong ka College, ka Dr. E.M. Blah, wei neiliang ka Kiang Nangbah Govt. College Students’ Union da e kti haroh ko ka dorkhat ha u Montri ka chnat Pure Puthi hajrong ki mat dawa wa kynthup u chna ka yung (Building) neibynta ka Post Graduate Degree Course, ka yung (Building) neibynta ka Library wa Computer Laboratory wei wow pynheh chooh chooh ya ka yung College wei wow thung wakreh ha ki kaam wa lait.
