Ka chnat khloo yong ka Khasi Hills Autonomous District Council (KHADC) da chimkhia ko kammon wow pynkhlan ya ki bor sonteri wei i emkaam wa hakhmat dooh neibynta wow yaleh pyrchah wei wow pynneh pynsah ya ki khlooo wei wow khang yei chalan tooh ya ki dieñ.
Ya ini i kaam ka KHADC wow pynkhlan yei rukom kreh, da pyntip da ka Executive Member (EM) ka chnat Forest ka Macdalyn S Mawlong hawa jubab hajrong iwa kylli u MDC ka Congress na Nongstoiñ, u Gabriel Wahlang ynne ka sngi kawa man leh ka sngi wa ar yong ka Dorbar Tlang ka KHADC.
Ka Macdalyn da pyntip ko wa katkam ki kyndon yong ka United Khasi Jaiñtia Hills Autonomous District Management and Control of Forest Act 1958 wa ka United Khasi Jaiñtia Hills Autonomous District Management and Control of Forest Rule 1960, ka chnat Forest ka Council da chim ko wow pynneh pynsah ya ki khloo deiwa pynkhlan ya ki ‘Forest Guard’ ha kylleiñ ki khloo wa haap hapoh u pood ka Council heiwa da phah ya ki wow lai sonteri ki kylleiñ ki khloo wa em hapoh ka Council.
Chooh chooh da pyntip ko wa heipor wa sonteri dang ha kini ki bnai da yoh leh wow khyrrup ya ki dieñ na West Khasi Hills, Nongpoh, Patharkhmat Ragne wa na kiwi ki thaw kiwa da kynjoh chadooh 35.748 Cubic Meter kiwa chongdor hadooh T. 3.34 lak.
Hajrong ini, kiwi ki laad wow pynkhlan wei wow yada ya ki khoo, ka Council da sdang ko wow kær (Fencing) ha Byrnihat Plantation iwa dang lai chaphrang wa kamjooh leh da booh ya ki moo morcha ha ki pood.
Hajrong ki kari kiwa kit dieñ khlem em ya ki Certificate of Origin wa ki Transit Pass, da chimkti ya ki dieñ wei daw lilam ya ki deiwa khut da ka ‘Open Tender’ katwa hajrong ka Working Scheme won, ka EM da pyntip ko wa neipor cheipor da jooh ebor ya ki bru wow pam dieñ ki heiwa emkaam leh wow thung salan ki ya ki dieñ katkam ka Working Scheme.
Da ong ko leh wa ka chnat Forest chirup wa ka chnat khloo ka sorkar jylla ha u snem 2021-2022 da dep pynman ya ka ‘Field Work’ yong ka Working Scheme ha kylleiñ wei ym slem de daw phah wow yoh yei mynjur yeini na ka chnat khloo ka sorkar pyrdi neibynta ki 23 tylli ki Khloo Kur næ Khloo Samen ha i thaw wa heh kamwa 6338 Hectare.
