Ka Congress kawa em ha ka liang pyrchah hapoh ka Khasi Hills Autonomous District Council, ynne ka sngi da khyrwait ki ya ka Executive Committee wa yahkhmat da ka UDP hajrong i yohlaad yong ka sorkar Assam wow chna ya ka Transit Camp ha u pood u ang ka Council ha Khanapara, Ri Bhoi District.
Hawa wanrah ya ka yatai ynne ka sngi ha ka dorbar mang tyngka, u MDC ka Congress na Mawhati, u Charles Marngar da kylli u yei wym ye wow leh iyi iyi yong ka Executive Committee wot hawa ka tip ko ya itai i leh pyrchah aiñ da ka sorkar Assam ha u pood u ang ka Council.
Da ong u wa ha i yachem wa ka Deputy Commissioner yong ka Ri Bhoi District, ka RM Kurbah, da pyntip ko wa ym em iyi iyi i thoh na ka KHADC hajrong katai ka bynta, deiwa da booh u yei kylli leh ya i slem ka Council wow yaklam ya katai ka phang wa ka DC nadooh wa sdang.
Chooh chooh u Marngar da booh u leh yei kylli ya i rukom krehkaam yong u Syiem ka Raid Marwet wa u Rangbah Shnong ka Khanapara kiwa da e bor yei thaw yaka sorkar Assam.
Hawa chimbynta ha katai ka yatai, neiliang u Ronnie V Lyngdoh uwa man leh u MDC ka Congress na Mylliem, da dawa u wa toh u takit bniah ya u Syiem ka Raid Marwet wa ya u Rangbah Shnong ka Khanapara ya embynta ki wow e laad ya ka Assam wow chim yei thaw yong ka Council, wei lada em kamtæ toh u pynchitom leh katkam ka aiñ.
Neiliang u Nominated MDC ka UDP, u Bindo M. Lanong, da e yumut u wa toh u chna da ka All Party Committee neibynta wow yaklam ya kam kini ki phang wa ka sorkar jylla, da pynbaad u leh wa ka sorkar Assam ym yohlaad ko u chim yei thaw lada ym emktilang da kiwa synchaar hima wa kiwa synchaar chnong.
Hawa jubab yeiwa yatai, neiliang u Executive Member wa pait ya ka chnat Elaka, u Jambor War da ong u wa ka Executive Committee da dep ko wow thoh cha u Chief Secretary yong ka Assam, cha ka Deputy Commissioner yong ka Ri Bhoi wei kamjooh cha ka yungkrehkaam u Deputy Commissioner ka Kamrup (Metro) hajrong itai i kam thaw da ka sorkar Assam.
Chooh chooh da pyntip u wa u Syiem ka Raid Marwet wa u Rangbah Shnong ka Khanapara da ujor ki cha ka KHADC hajrong katai ka leh embor yong ka sorkar Assam.
U EM da pyntip u leh wa katai ka thaw wa da chna yaka Transit Camp toh i yong u Nathaniel Thangkhiew, heiwa neiliang u MDC ka Congress na Mawhati da dawa u wa ka EC toh u khut hajir ya utai u tre thaw ya toh pynemkaam bakla ya i bor neibhah wa u tre thaw toh u Basan ka Hima Nongkseh.
