U Montri Rangbah ka jylla, u Conrad K Sangma da khyrwait u deiwa eh ya ki MLA ka Congress ka Liang Pyrchah, tangwa da ong u wa ym kwah u wow pynbaad ya ka sorkar warim wa da synchaar da ka Congress tangwa da nujor donhi u ya ki kaam wa ka sorkar MDA wa yahkhmat da ka NPP wa i por wa synchaar ka Congress ya ka jylla deiwa kyndang lut ya ki kaam ka sorkar ka Congress.
Hawa jubab ya i kylli wa da wanrah da ka liang pyrchah ha ka sngi wa kut ka dorbar synrai, u Conrad da ong u wa ka sorkar MDA da leh ko palat bar yeiwa da leh da ka Congress ha ki 48 snem nachwa, heiwa da ong u wa hawa sdang ka jylla Meghalaya em ko ha ka kyrdan wa 28 kam kiwa duna dooh kiwa chim tika yada COVID-19, tangwa nei kreh chitom ha i por wa tbian ka jylla katni da poi ko ha i kyrdan wa 3 na waroh ki jylla wa boon dooh kiwa chim tika.
Da ong u leh wa ya ka Scheme PMGSY, ka jylla da jan chah Black List ko ha ka sorkar India du nei wym ye ka sorkar warim u kreh, tangwa katni hapoh ka sorkar MDA da ye wow pyndep ya ki sarok da ki spah Kilometer, wei ka sorkar India daw e biang ko ya ka poisa neibynta ka Phase-II.
Da ong u wa chwa u snem 2018 em du 3000 tylli ki Self Help Group (SHG), tangwa du hapoh 3 snem tam ka sorkar MDA katni da em hadooh 33,000 tylli ki SHG ha ka jylla wei ka yung Dorbar Chna Aiñ wa thymme ka jylla lyngba i chimkhia u Lamphang da jan dep ya ka, katwa ha ki 18 snem wa synchaar ka Congress da ieh du hei pynwandur khlem i kreh.
Chooh da ong u wa ka chnat PHE nachwa da man ko kawa chong thiah khlem poisa tangwa da boonkaam ko katni nadooh wa wan ka sorkar MDA kawa da yakhun wow yoh poisa na ka sorkar India, wei da beiñ u leh ya i rukom kylli hajrong ka Scheme JJM la kamwa ki MLA ka Liang Pyrchah ym kwah ki wa ki paidbah u yoh um ki.
Hajrong ka Inner Line Permit da beiñ u ya ka sorkar warim wa ha ka 27 Khonchonglad (Nov) 2013, u Montri Rangbah ha itu i por da ong u wa ym emkaam ya ka ILP, wei ym kwah yaklam u hajrong kani ka phang, tangwa kani ka sorkar MDA da kreh ko wow yaklam wei wow mynjur da ka Resolution wei katni ka sorkar da booddien ko yeini.
Hajrong i kaam Them Metor, u Conrad da kylli u iyi wa da leh 48 snem wa em ki hei bor, wei da kob u leh deiwa pynkynmoo, kani ka sorkar MDA da chim ko ya i kaam wa ymem wa nood u klam.
Da pynkynmoo leh wa ka sorkar warim ym em u chim ko ya ka Resolution heiyatoh wa ka Eighth Schedule, deiwa kdaw wa i wanrah ka Congress ya kiwa boon ki phang toh wa kwah ko u leh Politics.
Heijooh i por da kdaw u wa i kaam khappood, ha ki 47 snem wa synchaar ka Congress da em du ki yalang wa i burom markylliang namo ka Status Quo, lait neitæ ymjooh leh iwon iwon leh, tangwa kani ka sorkar da lai ko cha ki chnong wa chah ktah wow yaklam wa ki paidbah wei da chimkhia ko wow rah ya kini ki kaam chaphrang wow pynbait noh ya u pood ka jylla.
Heiyatoh won wa ka Meghalaya Residents Safety and Security Act (MRSSA), da ong u wa toh ka sorkar MDA kawa da booh ya ki thaw mih thaw psiah cha ka jylla namo ki Entry wa Exit Point wei kani ka sorkar da sdang ko wow pynkrehkaam yei pynpsiah pyrtuid Online wow tip ya ki bru wa wan na baar jylla.
Hawa yatoh wa i pynbaad yei khayi mooyong pyrchah ya ka aiñ, u Conrad da ong u wa katkam ka bui (Report) yong ka CAG, nadooh u snem 2013 hadooh u 2018, da em hadooh 49 lak Metric Ton iwa man hadooh 5.6 lak truck wa khayi pyrchah ya ka aiñ ya u mooyong, tangwa ka sorkar MDA da khanglaad ko yei khayi mooyong pyrchah ya ka aiñ deiwa pynkrehkaam ya ka MMDR Act, wei da pynngat kyndon hadooh hadooh 301 ngut ki bru kiwa da chah kset hadooh 5 snem deilang wa ka kuna.
