U Wailadmiki Shylla hawa wan wow yasaaid ya kiwa boon wa chah pynbaad u kam u MLA ka 2-Jowai Constituency, da ong u wa oo da kreh bait u salonsar ya waroh ki kreh wa da ieh khlem pyndep da kiwi deiwa e nongmuna ya ka Umngot Water Supply Scheme kawa da yoh umkor ka chnong Jowai katni na ka wah Umngot kawa da sahteiñ nadooh u snem 2003.
Heijooh i por da ong u wa ym em ye u wow pyndep ya waroh neidaw wa wan ka khlam heiwa ar snem da hap chong khlem kreh heiwa najrong ka khlam da maad yei jhep, i sih sarok wa i wan ka bor rymaw, tangwa sñiawih wa kiwi da nujor ki ya oo wa ki 25 snem wa da lai heiwa heipor yong oo da yoh u wow kreh 3 snem donhi kamtæ toh u pait ya iwa da leh u wei iwa da pyrchang u ym toh wow pait ya iwa ym ye u wow leh.
Heiyatoh wa i wym ye u pyndep chna ya ka Iawmusiang Market Complex, da ong u wa hei lai luti u wow booddien ya ini i kaam da chem wa nyngkong da mynjur wow chna 7 mala da ka poisa wow e da ka sorkar pyrdi tangwa manda khut Tender ha itu i por won da khut wow chna da ka 3 mala wei hadien wa wan pait ki bru na Delhi hadien wa pynlait ya ka poisa (1st Instalment) da chem wa kammon da chna du 3 mala heithaw u chna 7 mala, kamtæ da kylli u cheiwon wiar kitæ ki soo mala wei da ong u wa na ini i daw wa katwa paan poisa neibynta ka 2nd Installment leh ym em pynlait ka sorkar pyrdi neibhah da ka poisa wa da dep pynlait kawa T. 6.33 klur da toh u pyndep u chna ya ka 3 mala.
Neiliang yong oo da wanrah u ya u Montri Rangbah uwa da ong wow lai chakhmat u chna da ka poisa ka sorkar jylla tangwa neidaw won wa u Contractor ym bien u wow pteiñ yei kreh hadooh wa hap pyndam oo wei da khut Tender deiwi, uni won u Contractor da lai u cha ka High Court yow pyrchah yei chah pyndam u wei ini i kaam katni da sahkut i hapoh ka yung bichaar. “Nachwa wa sangeh i kreh toh wym em poisa tangwa katni won toh wa e Case u Contractor,” da ong u Wailad deiwa pynrap wa kam u MLA ym em chong klikti u neibhah hadooh ka Bill u Contractor leh toh oo wa li beh yow pynlait ka yow bien u Contractor wow sdang yei kreh.
Hajrong i jhep da ong u wa da ong u wa da pynman blang kñia ya oo neibhah ki kyrtong MLA katni waroh arngut toh kiwa da jooh man CEM hapoh ka JHADC wot i thaw noh jhep ha Mynkjai leh toh i yong ka District Council.
Da kylli u leh heipor wa man CEM u kyrtong ka TMC dang man MLA u Dr. R.C. Laloo ileh wym ya soi soskular kawa ym duk de u awri hadien heiwa katni da chah pynbaad cha oo kam u MLA.
Da kdaw u leh yeiwa da leh u yow pynkhai im ya ka Jowai Municipal Board kawa da yang chwa ka tulop ki wakreh katni, ki kari kit jhep leh da dep thied, ka yung krehkaam leh da pynheh.
Da ong u leh wa da phah ya u SP wow kyrriah ya ki bru wa pyrchah yei noh jhep ha Mynkjai tangwa ym em leh u iyi iyi leh, kamtæ da kylli u uyi wa ksoh Home Minister.
Kamtæ da ong u wa lada e laad biang sa chisien ya oo kam uwa mihkhmat ye hi u wow pynbait chisien pynbait ya ini i kaam.
Heiyatoh wa ki luti syngkieñ, da ong u wa i kreh toh iwa da sdang wei kiwa boon ki sarok ha ka thaaiñ Ladthadlaboh toh kiwa da dep u chna wei manda chna ya i bynta nadooh na yung krehkaam u DC hadooh ha Khimusniang, u chna da uwa rben bha yow neh uni u sarok yow lait u pynchna sarok man ka san snem yow ye u pynlut bor cha kiwi ki bynta.
“Hei sien nyngkong nadooh wa poi ha nga da yoh sarok lut ka chnong Jowai nadooh na khlieh hadooh ha tre hadooh wa kiwa kamai Local tang u Start kari leh ym duk de ki, da u Neutral da biang u pyntyllung kari wa yillih ware u sarok,” da ong u Wailad deiwa pynrap wa ki dooid leh da chna pynmiat.
Hajrong won wa pynbaad wa da boon ki yung krehkaam da lut ki na Jowai, da ong wow sñiawbha u pynyoo yei thaw wa dang em yow lai pynyoo u ya kiwa paan thaw deiwa pynche chooh chooh wa mynstep mankawi kamwa ymyoh thaw de ya ka North Division ka PWD kiwi won ki yung krehkaam sorkar kiwa dei chim wai daw chah rah lut ki cha baar kamtæ da ong u ya u Montri Rangbah yow booh noh da ka Mini Secretariat yow booh ya kitu ki yung krehkaam ki wym em dei yong ki hi i thaw.
Da pynyknmoo u wa ka yung krehkaam ka NEC ym pu em slem da dep rah wei uyi wa man MLA heitu i por.
Heiyatoh wa u mooyong leh da pynkynmoo u ya ki paidbah kayi ka sorkar wa em heitu i por kawa ym em wan chakhmat yow lait nei chah khang ha ka NGT, “Uwa yahkhmat ka Congress heitu i por uwa yahkhmat ya ka TMC katni ym bien u wow leh iyi iyi yow yoh u wow pynlai ya ini i kaam du oo samen donhi hadooh wa da chah ktah ka District Council katni wei nga da yieñ u wow klam samen hapoh ka Assembly yeiwa emkaam ki District Council,” da ong u Wailad.
Da ong u leh wa dei kreh chitom u, ka chnat Urban kawa jooh e T. 30 lak chi bnai ya ka sor Jowai yow pynbha pynmiat ya ka chnong Jowai tangwa katni hadien wa da yaklam hapoh Assembly da yoh T. 1 klur hadooh wa da yoh wow chna sarok cha ki bynta ka Khimusniang iwa man i bynta wa em ha chrooh ka yung krehkaam ka JMB heiwa da dep khut Tender wei u Contractor da yoh u ya ka Work Order yow sdang noh yei kreh.
Ya ini i klam u Wailadmiki toh ha ka rynsan yalap Election Common Platform Election Campaign wa da pynman da ka Dobar Chnong Khimusniang, Jowai ha ka 9 tarik uni u bnai heiwa da emlang leh waroh ki kyrtong ka 2-Jowai Constituency wa kyntup ya u kyrtong ka UDP u Moonlight Pariat, u kyrtong ka BJP u Allan K Suchiang, u kyrtong ka TMC u Awhai Andrew Shullai wa u kyrtong ka Congress u Daniel Dan.
