U President ka National People’s Youth Front (NPYF) uwa man leh u MLA ka Jowai, u Wailadmiki Shylla da ong u wa ki 8 ngut ki MDC ka Voice of the People Party (VPP) ha Jaiñtia Hills Autonomous District Council (JHADC) toh kiwa jop dei bor yong ki samen hi ha ka Election wa dang dep ha uni u snem wei ymtoh hei pyrtuid ka VPP.
Hawa pdiang wa ka VPP em ko ya ka la-ær ha ka Election, da ong won u wa hachwa ka Election MDC hawa pait da yoo lakam ka VPP daw rah ko naphang ha Jaiñtia Hills bar ya ka Khasi Hills, tangwa manda wa mih Result, ka VPP da jop ko du 8 ngut ki MDC, wei hadooh kattæ ya ka Executive Committee ha JHADC da yahkhmat da ka NPP.
U Wailad da ong u wa em ki bru kiwa pait ya ka VPP kam kawi ka luti, wei katni hawa ka VPP em ko hei bor synchaar ha Khasi Hills Autonomous District Council (KHADC), ki paidbah daw pait wei daw bichaar ki ya iyi wa da kular ki wow leh neibynta ki paidbah.
Da ong u leh wa ka NPP u kreh ko katwa ye i bor yong ka wei da pynsñiaw u leh yei kitbok neibynta ka VPP wa da ye ko wow leh yeiwa da kular cha ki paidbah.
Ha iwi i liang da ong u wa i chna ya ka Iawmusiang Shopping Complex toh iwa da lai chakhmat wei oo leh da lai pait u neipor cheipor yei kreh wei da kyrmen u wow pyndep yei kreh hapoh 24 bnai.
Heiyatoh won wa ka Mini Secretariat da ong u wa i kreh yeini leh da lai bha chakhmat wei daw yarap ko ya ki bru na Jaiñtia Hills yow lait ki u lai cha Shillong neibynta ki kaam sorkar.
Discussion about this post