U montri rangbah ka jylla, u Conrad K Sangma ynne ka sngi da chimbynta u ha ka Outreach and Familiarization Programme for Local Bodies ka jylla Meghalaya wa kiwi ki jylla ka thaaiñ mihsngi ya kawa da pynman da ka Parliamentary Research & Training Institute of Democracies (PRIDE), Lok Sabha Secretariat wa ka District Council Affairs ka Meghalaya.
Ya kani ka yalang da wan wai da u Speaker ka Lok Sabha, u Om Birla hei emlang u Speaker ka Meghalaya Legislative Assembly u Metbah Lyngdoh, u montri ka sorkar pyrdi wa pait ya ka Food Processing Industries u Rameshwar Teli wa kiwi kiwi.
U Conrad K Sangma hawa e yei klam da ekhublei u ya u Om Birla wa da pynman ya kani ka yalang ha Shillong wei da kyrmen wa kattu daw ye chooh u pynkhlan ya ki District Council wa kiwi ki kyrdan synchaar ha ka thaaiñ.
Hajrong ki ADC, u Conrad da ong u wa ka jylla Meghalaya em ko le tylli ki jaitbru kamtæ em leh le tylli ki District Council neibhah i kaamram yong ki toh wow yada yei rukom im wa kyrpang ki jaitbru ri-loom. Da thoh ya ki Sixth Schedule Areas toh wow yada ya i rukom im ki jaitbru ri-loom wei ki ADC toh ki bynta wa emkaam dooh ha i synchaar ha ka jylla Meghalaya.
Hajrong i emkaam ya ki District Council ha ka juk wa katni, u Conrad da ong u wa boon ki bru samen da kylli ki wei da artatien ki yei rukom kreh ki District Council wei ymye ki wow leh ya ki kaam yong ki katkam ka thong wa da booh ya ki tangwa ha u Conrad hi samen sñiaw u wa i daw wa sdang ya ki District Council da poi i cha ka thong wei emkaam wow yada ki ya i rukom man kyntang ki jaitbru.
Heiyatoh won wa ka muna tyngka ki Council wa da chah ktah ki, u Conrad da klam u hajrong ka Article 280 heiwa da ong u wa i e yarap poisa na ka sorkar pyrdi toh ya ki Panchayati Raj, Municipal katwa ya ki District Council won ym em u kynthup ya ki iwa toh u yoh yarap na ka Finance Commission.
Da ong u wa ki Council ymye ware ki wow pynmih poisa pyn daki hi wei i wymyoh yarap poisa ki na ka sorkar pyrdi da ktah ko yei rukom kreh yong ki..
Heijooh i por u Conrad da klam u leh ya i wym em ki aiñ wow kdoh nei yut seiñ namo ki Anti Defection Law wa ka Tenth Schedule ha ki Council iwa da ktah bha ya ki.
Da pynsñiaw u leh yei mynsien wa kmen hajrong ka ‘Sixth Schedule Amendment Bill’, heiwa ka Select Committee da ye ko u tyrwa ya ki buit ki budia wa emkaam hajrong ki District Council.
Da kyntu u leh yei emkaam wow kynthup ya ka ktien Khasi wa Garo ha ka Eighth Schedule, wow esikai ha ki skur chaphang ka thaaiñ, wei da tyrwa u leh yei emkaam wow em ka Presidential Retreat namo ka thaw sah u President ka ri ha thaaiñ mihsngi.
