Ka Montri wa pait ya ka chnat i chait i khiah ha ka jylla, ka Dr. M. Ampareen Lyngdoh da ong ko wa kiwa kreh ASHA toh kiwa kreh mon sñiawbha næ ki Volunteer ha ki chnong, wei ka sorkar burom ko ya ini i kreh yong ki deiwa e leh yei su, tangwa wow pynku yei su ym mih i neibhah wa yoh ki yei rukom su waphær waphær.
Hawa klam wa ki laad pathai khubor da ong ko wa hawa yaklam wa ki ASHA da yatai sani bha yei dawa yong ki wa kynthup yei yoh sumaar kjut khlem da emkaam su poisa wei da pyntip ko wa neiliang ka sorkar da mynjur ko ya ini i dawa.
Heiyatoh won wa i dawa wym e bor de ya ki dorbar chnong wow rai yei thung wei wow pyndam kreh ya ki ASHA, da ong ko wa katkam i rukom krehkaam, ki ASHA toh kiwa kreh hadooh ar 2 snem ymtoh wow kreh da ki jooh chi ki jooh ki bru.
Da ong ko wa ka sorkar emkaam ko yei ya krehlang wa ki dorbar chnong neibhah du ka sorkar ym ye wow pait yeiwa emkaam yong palat 6000 tylli ki chnong hapoh ka jylla, deiwa pynrap wa heipor wa wan ban ka khlam COVID-19, toh ki dorbar chnong kiwa da kreh borbah wow pynlait ya ka jylla nei dooh wa khroo i mynsien bru.
Ka Dr. Ampareen da klam ko deiwa che wa ka sorkar ym ye ko wow kular iyi iyi ya kiwa kreh ASHA iwa daw ktah won ya kiwi kiwa kreh mon sñiawbha ha kiwi ki chnat, tangwa da kyntu ko wa ki ASHA wow sangeh noh yei yakhih wei wow kreh bait yei kaam yong ki.
Discussion about this post