Shillong: U President ka Khasi Students’ Union (KSU), u Lambokstarwell Marngar da pyntip u wa i thombor yong ki baar jylla ynnin ka sngi ha ka chnong Ichamati ya ki dkhot ka KSU wa kiwi ki seiñbhalang toh kawa da pynkhreh chwa.
Hawa yaklam ynne ka sngi wa uni uwa yahkhmat uwa emlang ha itai i jia, da pyntip u wa katkam wa da yoh yutip da ka seiñ, ki baar jylla ym toh du kiwa na Ichamati, wei da wan leh na Majai wa kiwi ki thaw ka thaaiñ khappood neibhah kitai ki baar jylla da hiar thma ki ya ki dkhot seiñbhalang hadien wa da dep baam wei boon kiwa da liwan.
Ha i jooh i por da beiñ u yei pynbaad ka SP yong ka East Khasi Khasi Hills ha ki laad pathai khubor wa ki dkhot ka KSU da sdang ki ya ini i kulmar deiwa lai thang ya u skum kba wa ya ka yung. Da ong u wa ka seiñ ym ye ko wow pdiang ya ini i pynbaad yong ka SP kawa chong haka chuki ha nongbah Shillong.
Ha iwi i liang da ong u wa ka seiñ nadooh ki por wa nachwa da dawa ko ya ki aiñ wow yada ya ka jaitbru wei lada ka sorkar ym khyrngiat yong bru de ko katni, ym khyrngiat de ko.
U Marngar da maham u ym du yaka sorkar, wot ya waroh ki baar jylla wa toh u mih chwa ki chwa i jia umsnam neibhah ka seiñ ym ye de ko wow ap hadooh wow dooh noh yei mynsien wa ka doh ka snam.
Da beiñ u leh yaka sorkar jylla wa chim stiñ wei leh jemnood hawa yatoh wa i rai pynkrehkaam ya ka ILP wa da mynjur da ka dorbar ki 60 ngut ki MLA.
Lada ka sorkar ym khyndang syndon ko ya ki baar jylla, ym yohsa wow leh hi noh: Sadon Blah
Neiliang u Sadon Blah uwa man uwa yahkhmat ka HNYF da ong u wa ini i jia da mih i nei tlot i rukom krehkaam ki bor yong ki pulit neibhah ki pulit kiwa poi ynnin ka sngi da poi ki du da ki lathi katwa ha kiwi ki yalang boon ki pulit ya ki dkhot yong ki seiñbhalang.
Da pynbaad u wa ka sorkar ka pyrchang ko wow lai da ka luti kawa kylleiñ neibhah wa ym ye ko wow pynmankaam ya ki dawa wow wanrah ya ki aiñ wow yada ya ka jaitbru wa khian paaid. Da dawa u wa ka sorkar toh u khyndang noh chi syndon ya waroh ki baar jylla wa chong pyrchah yaka aiñ, wei lada ym ye ko wow leh kamtæ, ki seiñbhalang ym yohsa ki wow chim hi noh ya ka luti yong ki.
Maham u President ka FKJGP ya ki bor chnong wa kdup baar jylla
Neiliang u President ka FKJGP, u Wellbirth Rani da ong u wa ka sorkar toh u chim ko ya i kitkhlieh hajrong i kynad wa da mih ynnin ka sngi ha Ichamati. Da maham u leh ya kiwa pynlaichnong wa kiwa chong chnong kiwa kdup ya ki baar jylla ha katai ka thaaiñ.
Da ong u wa lada ym em kiwa kdup, kitai ki baar jylla ym yoh hi ki leh wow chong ha katai ka thaw, da maham u deiwa eh u wa lada jia iyi iyi neini chakhmat hap ki wow kitkhlieh neibhah i dooh yei mynsien ym ye de wow pynsñiaw da kamwi won.
Discussion about this post