U MLA ka Jowai Constituency, u Wailadmiki Shylla kam u kongsan haka yalang pynsñiawthooh paidbah wa da pynman hajrong ka phang Human Rights næ ka hok longbru manbru wa pynman da ka Meghalaya Human Rights Commission chirup waka Kiang Nangbah Govt. College Jowai ha ka 27 tarik, da ong u kat nang boon ki rynsan yoh sikai Online, wei kat nang boon ki laad yoh yutip, ki bru leh nang joor i smat bichaar ki khlem da tip bniah yei tre wa sakhiat.
Kamtæ hachwa wow bichaar kyntu u wow puræ wei thooh bniah chwa katwa ye wa lah, deiwa pynrap leh wot kiwa wan emlang ha kani ka yalang leh boon wym tip ki jar jiar i hok.
Ong u ka hok manbru yaar bha ko tangwa chong hajrong kammon u pynemkaam yaka. Kamtæ iwa kam kani ka pynsñiawthooh emkaam u pynman neipor cheipor khnang wa ki paidbah u yoh ki yei hok.
Da pynkynmoo haroh u hajrong i kulmar pyrkhat wa jia dang ini wa dep hapyrdi ki khynnah skur wa ki paidbah ka jylla neiwa tem yei sur kawi naki seiñ saiñhima hapoh kawi ka skur, heiwa da em kiwa ong toh i tyngkheiñ yei hok ki khynnah skur kiwa kwah ki u pynsñiaw yei mon yong ki namo ka Freedom of Expression.
Heiyatoh wa ini ong u toh u pyrkhat won leh wa la e laad katni yi wow jia mynstep mankawi boi te tem ki khynnah skur da kiwi won ki jait rwai, næ boi ye u man i rwai dei kyntien wym sñiawsuk weiwa ktah yei sñiaw kiwi won ki jaitbru.
Na itæ i daw pynrap biang u wa i pynsñiawthooh namo ka Awareness man ko kawa emkaam bha.
Ha kani ka sngi da yoh i klam pynsñiawthooh hajrong i hok manbru na ka B. Giri, dkhot ka Meghalaya Human Rights Commission, na u Jopmiki Shylla, Advocate wa na u Prof. A.K. Singh, Department of Law NEHU.
Discussion about this post