U MLA ka Mowkaiaw, u Nujorki Sungoh hawa chibynta ha ka phang yaklam heiyatoh wa ki kaam khappod yow wanrah ki kaam pynroi ynne hapoh ka yung dorbar chna aiñ, da ong u wa kamwa man kattæ dang tyngkleiñ ware ki kaam khappood hapyrdi ki jylla bar ya ki khappood wa kiwi ki ri.
Da ong u wa hapoh ka Block-I da em 36 tylli ki chnong kiwa chong chnong da ki Pnar wei wot ki kur ki jait ki kam ki Thaiang, Myrten, Lamare wa kiwi de toh ki Pnar paka wei wot i pyrtuid ki um ki wah, ki dieñ ki siej, ki chnong ki thaw leh toh dei ktien Pnar hi.
Da kdaw u leh ya ka thaaiñ Labang Nangphyllut wa em 9 tylli ki chnong kiwa chong chnong da ki Pnar tangwa hawa lai u cha kani ka chnong da man ko kamwa lai biang cha ki snem 1970 heiwa ki yung leh toh da ki yung phlang, ki luti syngkieñ leh ym em, ka bordiñ leh ye em, ka thaw sumaar leh ym em wei ka umdih leh ym em.
Ha kani ka thaw wa em du 30 tylli ki manyung, du iwi ar donhi i yung wa yoh u sap da ka Tin katwa kiwi waroh toh da ki yung phlang, tangwa wot lada kani ka chnong da em ko ym duna ya ka 100 snem, duna bru bha ko neidaw wa joor boon kiwa yap ha kini ki 40-50 snem wei ymtoh wa yut chnong ki bru.
U Nujorki da khana u leh yeiwa pyntip uwi u Pastor cha oo uwa em ha kani ka thaaiñ wa em ka khynnah kynthai kawa dang 3-4 snem wei da pynbaptist u ka ha ka sngi Thohdieñ tangwa ha ka sngi Bibar won da yap ko khlem daw hawa ka man ko kawa chait wa khiah.
Kamtæ da kyntu na ka sorkar wow booh bhah ko ka poisa neibynta u chna sarok neibynta kani ka thaw kawa daw yarap bha ya ki bru.
Discussion about this post