U Symbood Montri Rangbah ka jylla Meghalaya, u Prestone Tynsong, ynne ka sngi da wai u yaka Workshop wa chi sngi hajrong ka phang ‘Urban Mobility for Shillong City’ kawa da pynman ha State Convention Centre, Shillong. I thmu kani ka Workshop toh wow yaklam hajrong i chem wa i tyrwa wa mih na i thooh bniah ka Dalberg yow pynkyllooid yaka sor Shillong.
Ya i bichaar yei chem i thooh bniah kamjooh kammon wow lai chakhmat da pait daka Meghalaya Infrastructure Development and Finance Corporation Ltd. (MIDFC) deilang waka Project Management Unit (PMU) ka Meghalaya Integrated Transport Project (MITP), kawa da kyrchaan daka World Bank.
Hawa e yei klam, u Prestone Tynsong da yooluti u wa iwa chem nei thooh bniah da ka Dalberg daw yarap ko wow pynkyllooid yaka Shillong. Da ong u wa i tyrwa wow pynemkaam da ki Cable Car toh iwa yahaap bha waka Shillong neidaw wa i thied thaw yow chna sarok, chna Flyover toh iwa jynjar bha neidaw i rukom mantre ya i thaw hapoh ka jylla. Da mynjur u leh wa katni emkaam wow thooh laad kiwa ye u pynkyllooid chi por yaka sor kamjooh wow pynboon yaki Bus wa kynthup yaki School Bus.
U Dr. D. Vijay Kumar, Project Director, Meghalaya Integrated Transport Project (MITP) wa CEO, Meghalaya Infrastructure Development and Finance Corporation Ltd. (MIDFC) hei klam yong oo da ong u wa i chitom wow pynkyllooid ya ka sor toh iwa kylleiñ bha wei emkaam i ya krehlang wa kiwa boon. Deiwa pynrap wa ka Shillong ye ko wow man kawi na ki sor wa bha dooh ha pyrthai kamjooh kawa bha dooh na ki Hill Station hapoh ka ri, tangwa lada ym ye won u pynsuk yei lai i wan, daw chem chitom wow mansakhiat ini.
Ha i thooh bniah daka Dalberg iwa da leh deiwa pyrkhat yeiwa emkaam ki paidbah kamjooh yow wailaad wow yoh khih yoh khan, da tyrwa wow pynboon yaki Bus kit paidbah kiwa lai boonsien haka chi sngi; u chna ya ki Ring Road yow pynyait yaki kari wa wan na ki National Highway; i booh ya ki Cable Car yow pynduna yei pynemkaam yaki sarok; u pynchlur yei lai kjat khamtam na iwi i thaw wa uiñke suwari cha iwi deiwa chna yaki thaw lai kjat wa kyrpang, u booh yaw ha kiwa boon ki thaw yow lait u ya lai waroh ha kawi ka yaw; u booh pood katwon tylli ki kari wa ye ki bru u thied, u pynduna yei pynyieñ kari ha rood sarok ha ki thaw ka Municipal, u chna yaka Shillong Township wa kiwi kiwi.
Kiwi de kiwa da ya emlang ha kani ka sngi toh u DGP, Meghalaya, u R. Chandranathan waka Deputy Commissioner, East Khasi Hills District, ka I. Laloo.
Ha kani ka Workshop da wan chimbynta leh da ki sahep na kiwa boon ki chnat sorkar, kiwa yahkhmat chnong, kiwa mihkhmat na ki thaw puræ, ki tre Hotel wa ki Dorbar Chnong.
