U Montri ka sorkar MDA-II, u Paul Lyngdoh ynne da ong u wa ki pulit ka Central Reserve Police Force (CRPF) kiwa man kam ki bor wym leh chiliang daw booh ya ki du ha ki thaw wa em i kynaad, kiwa mih i kulmar neipor cheipor wei ha ki thaw wa ye u mih i ya kajia.
Da pynche u leh wa ya ki CRPF ym booh ha Langpih neibhah ym em ki dak wa ye u mih i kulmar katkam wa da chem ka sorkar.
Hawa klam hajrong i pyrchah ka FKJGP wow booh ya ki CRPF ha kam kini ki thaw, da ong u wa i pyrchah leh daw mih i lada ym phah da kiwon kiwon deiwa pynrap wa lada ka Meghalaya phah ko ya ki pulit yong ka, ka Assam daw pyrchah wei lada phah ka Assam won, ka Meghalaya leh daw pyrchah ko wei lada phah da ki CRPF da em ki seiñbhalang wow pyrchah.
U Paul da kyrmen u leh wa ha uni u snem daw ye noh u soi yaka soskular pynbait pood yong ki thaw wa sah yow ye u bood noh ya kini ki kaam ya kynaad chadien.
U Montri Rangbah ka jylla, u Conrad Sangma leh da pynche u hajrong ini deiwa ong wa ka Meghalaya da mynjur ko wow wanrah da ki CRPF hadien wa da chim rai ka Assam wow kyrriah noh ya ki pulit kiwa da booh Outpost wot ha ki thaw wym em kajia pood.
Kamtæ da ong u wa yow pynyoo yei ya krehlang, ka Meghalaya leh da rai ko wow rah ya ki pulit chadien rap chapoh ka Meghalaya.
Kam wow pynkynmoo wa ha ka yaklam pynbait pood wa da pynman ha ka 30 tarik u Naikhynde wa dep, ki ar Montri Rangbah ka Meghalaya wa Assam da chim rai ki wow booh noh da ki CRPF ha ki khappood wa joor i kynaad kam ha thaaiñ Khanduli-Psiar.
Discussion about this post