15 49.0138 8.38624 1 0 4000 1 https://wyrta.com 300 0

Ki dawa kiwa dai madan toh ki wym chongnia: Paul Lyngdoh

0 Comments

Shillong: U Executive Member wa pait ya ka khayi pateiñ ha ka Khasi Hills Autonomous District Council (KHADC), u Paul Lyngdoh da ong u wa hadien wa ka Council da bichaaar bniah ko yei dawa ki bru kiwa da tia cha KHADC da chem wa man ki ki wym chongnia heiwon iwon leh neibhah da pynbaad ki wa ka KHADC ym burom ko ya ka rai ka High Court ha u snem 2016, deiwa ong wa kani ka hukum man ko du kat ya ka sorkar jylla.

Iwi won wa da dawa ki toh wa ka KHADC ym burom ko ya ka aiñ The Street Vendors Protection of Livelihood and and Regulation of Street Vending Act, 2014, hajrong ini u Paul da ong u wa kani ka aiñ toh kawa da mynjur ha ka dorbar Assembly ha u snem 2014, wei klam che ko leh wa kiwa dai madan kiwa man ki baar jylla toh u pyndep ki yeiwa emkaam wa da booh da ka District Council katkam ka Trading by Non Tribal Act, 1954.

Hajrong i chim Form ki tre chnong, u Paul da ong u wa ini man i neibynta i bha i miat ya kiwa dai madan wow tip yei kreh ki, wow tip ki thaw wa chong ki wei wow pynsakhiat ya kiwa kamtre hi-eh neibhah wa da boon kiwa chim kabu donhi. Da ong u leh wa i e Form ya ki tre chnong toh wow yada ya ki nei chah yoohbeiñ wei wow yada yei leh Benami iwa da joor bha hapoh jylla.

Chooh chooh da ong u wa ini daw yarap i neibynta kiwa im nei chong dukan ha sarok wow yoh dukan ki lada ka sorkar booh ko ki yaaw wa kyrpang neibynta yong ki neibhah ka High Court leh ha ka hukum da phah ko ya ka sorkar wow pynbiang ya i thaw neibynta kiwa chong dai madan.

U EM da phylla u leh yei wan tia kiwa chong dai madan kiwa da tia cha KHADC ynnin ka sngi heithaw wow pyntip chwa cha ka Council da e daw pathan ki deiwa ong ya boi em ki wym yoh ya ki Form.

Hajrong won i dawa wow e Trading Licence cha ki baar jylla khlem chah liang, u Paul da kylli u wa neiyi i daw wa ka Meghalaya & Greater Shillong Progressive Hawkers & Street Vendors Association da lai ko palat yei rukom krehkaam wei iyi em yatoh ko wa i e Licence cha ki baar jylla.

Da kyntu u leh ya kiwa chong dai madan wymtoh u chah yah bakla ki du wow myntoi kiyi re kiyi, wei kiwa kwah myntoi na ka Council toh u wan mih ki chakhmat, katwa ki wym kwah u krehlang waka Council ymye ko u ong iwon iwon ya ki.

Chooh chooh u Paul da beiñ u yei rukom wan tia kiwa chong dai madan cha KHADC iwa pynyoo yei wym burom ki ya ka wei man i leh i wym yoosuk.

Hajrong i dawa kiwa dai madan na u Chief Executive Member, u Teinwell Dkhar, ynne ka sngi, u Paul da ong u wa napyrdi ki 5 ngut kiwa yachem ya u CEM, 2 ngut toh kiwa da chah daiñ kuna ha ka High Court  hadien wa da chah rai pynrem ki neibhah wa da yaleh pyrchah ki ya i pynbna ka Council wa da pynmih ha ka 14 Naichiphaw.

0 Comments

Leave a Reply