Shillong: Ka ‘Peace Concert’ wa pynman da ka Meghalaya Pradesh Congress Committee (MPCC) da pynchongchit ko ya ki paidbah wa wan tooid cha madan Polo, wei ha kani ka Concert da em leh u President ka AICC, u Rahul Gandhi kam u kongsan.
U Rahul hei klam yong oo ha kani ka janmiet da ong u wa ka khubor ymtoh du neibynta ki khynroo khyllood ka Meghalaya kamjooh leh ya ki khynroo kyllood ka ri hi waroh kawi.
Da ong u wa i khlan ka ri India toh wa em ki dustur riti wa i ngait waphær waphær, nadooh ka ktien ka thylliej wa i rukom pyrkhat heiwa da pynrap u deiwa ong “I khlan i lada waroh yieñ lang i hei man kyrpang”.
Da ong u wa waroh ka jylla wa kynthup ya ka Meghalaya em thaw ko hapoh ka ri India wei waroh kiwa chong chnong ya ryngkat ki wei ym em kiwa heh namo kiwa khroo.
Da pynsñiaw u yei mynsien wa kmen wow embynta ha kani ka tamasa neibynta ka suk ka saiñ wei da ong u leh waka ri India man ko kawa khlan heiwa maya wei wow burom markylliang.
“Hawa ya kyn-aad para i wei pynpoor i yei sñiaw yachoon ym pynkhlan i ya ka ri wei pyntlot pathan i ka wei pynyoo wa ym em burom i para bru waka mynried yong i,” da ong u Rahul.
Da e u leh ya ka khubor cha ki khynroo khyllod wow sñiaw sarong ki yei mantre yong ki.
“I sñiaw sarong i neibynta yong phi wei emlang i wa phi wei u yada i ya phi wei kamjooh u yada i ya ka dustur riti wa i rukom im yong phi,” da ong u hehdooh ka Congress.
Da ong u wa i wan yong oo cha kani ka jylla toh wow yalap Election tangwa oo hi da pynsñiaw u leh wa wan u du neibynta wa maya ki paidbah.
U Rahul da ong u leh wa daw wan biang u cha kani ka jylla ha kini ki sngi wow wan wow yachem wa ki khynroo khyllood ka jylla wow sñiawthooh yei eh i khoo yong ki.
Discussion about this post