U Montri sorkar pyrdi wa pait ya ka chnat AYUSH waka Ports, Shipping & Waterways, u Sarbananda Sonowal da ong u wa ka thaaiñ Northeast toh kawa em chiboon wa ye u chim kabu manda ku biang ki kaam khayi pateiñ hapoh ka ri. Da ong u leh wa i mahajon hei rep i riang, wa i spah ka rymaw nadooh ki dawai kymbat wa i rukom sumaar tynre daw yarap ko wow pynku ya ki kaam wa yatoh wa ka AYUSH kamjooh wow pynmih ya ki karkhana ha kani ka thaaiñ.
U Montri da ong u ya ini hawa embynta ha ka Review Meeting ka North Eastern Institute of Ayurveda & Homeopathy wa da pynman ha Umiam, Ri Bhoi District, Meghalaya ynnin ka sngi. Wei heipor wa yaklam wa kiwa thoh khubor, da ong u wa da emkaam leh wow pynmih ya kiwa lai puræ kiwa stat bha, deiwa pynrap wa emkaam leh wow em ki thaw puræ puthi wa biang.
Da ong u leh wa emkaam ki thaw puræ neibynta ki Ayurveda Nursing wa Pharmacy kamjooh ki Short-Term Course ha ka Panchkarma Therapy yow ye ki khynroo khyllood na thaaiñ Northeast wa na kiwi ki bynta ka ri u yoh myntoi yow pynmih leh ya ki bru wakreh wa pliah.
U Sarbananda da ban joor u wa ka sorkar kreh ko yow pynku ya ka thaaiñ Northeast yow man ko kam ka kor kawa ye u pynku ya ka India ha i khayi pateiñ.
