Ki kaam pyrchah aiñ ha kylleiñ ka jylla

Haka 30 tarik uni u bnai heipor 10:30 i miet, heipor wa sylli ya ki kari ha Mawlai, GS Road, Shillong, ki pulit da kem ki ya ka AS-01FC-2713 kawa kit mooyong be-aiñ wei uwa yah da yut u na ini i thaw.

Ha kajooh ka sngi u Kenny Dkhar da ujor u wa hapyrdi 12:00 i synyaw hadooh 5:00 waje i step ki damok wym tipmit da tooh ki ya ka thuk thuk yong oo wa em u No. ML-05G-0609 na Sunny Hills, Shillong.

Ha ka jooh ka sngi heipor kamwa 10:30 i miet da em ki damok wa psiah tooh ha i yung ka Youthanisha Dohkrut wa em ha Mawlai Motsyiar, Shillong wei da tooh ki T. 48,000 chirup wa i ksiar.

Ha ka 28 tarik ka Meristella Myrthong da ujor ko wa ha kani ka sngi ki damok da psiah ki ha i yung ko iwa em ha Howell Road, Shillong heiwa da tooh ki ya ka LED TV, 50 song ki cigarette wa ka poisa wa T. 5,000, wei ha ka jooh ka sngi ka Kermaya Niang da chah tooh u kum LPG wa ki juti chi kjat na yung ko iwa em ha Nongthymmai, Nongkhyriem, Shillong. Ha i janmiet won da kem ya ki le ngut wa suba wa emkti heini i kaam  kynthup ya u (1) Kennedy Lyngdoh, (2) Bhim Sunar (3) Binod Lama wei da chem ya kini ki chi kjat ki juti na ki.

Related posts

Tympiah ki damok ya ka yit kari uwa thoh khubor, chah tooh ki Laptop wa kiwi ki tiar

November 27, 2024

Phone kiwa maham kem wei dawa poisa pyn ha u heh pulit heipor wa dang yaklam u wa kiwa thoh khubor

November 27, 2024

Hadien wa yoh yutip wa tikna ha ka 26 tarik wa em ki damok wa thmu wow rahbor ya ki bru samen, ki pulit da lai sonteri ki cha ki thaiñ Williamnagar – Rongram – Dadenggre (WGH) wei manda yoo kini ki damok ya ki pulit da yut ki u na kini ki thaw deiwa ieh ya ka muna hapoh ka bus wa chong u. Manda kynreh ya kani ka muna da chem ya ka pistol 7.65mm chirup wa ka magazine wa em le kuli ka tari, ki mobile phone wa kiwi kiwi.

Ha ka 12 tarik uni u bnai da em ki damok wa lute ya iwi i dukan u Chandrokanto Rabha wa em ha Hotogaon Bazar (WGH) wei da tooh ki ya ki mar wa chongdor T. 96,607.

Ha ka 8 tarik uni u bnai u Abdul Akhtar Sheikh na Bholarbhita Chibinang na Phulbari PS (WGH) da ujor u deiwa pynbaad wa u Sahabul na Freshatari, South Salmara PS, Dhubri, Assam da lai u cha yung u wei da rahbor u ya ka khon u (Abdul) wa 18 snem heiwa da yarap ya oo (Sahabul) wow yut da ka thuk-thuk u Babu Mollah. Hadien ini da chem wa da chem wa wiar i ksiar wa chongdor T. 85,000 wa ka poisa wa T. 1 lak na yung yong u Abdul.