Ka sorkar Meghalaya lyngba ka General Administration Department (B) da pyntip ko wa emkaam wow leh Aadhaar neibynta ki khynnah wei ym hoi leh u dam wow pyndep ya ka Biometric Update neibynta yong ki.
Da ong leh wym em booh dei rta wei wot kiwa dang kha leh hoi hi u yaleh Aadhaar ki, wei neibynta kiwa dang kha hadooh kiwa em 5 snem, ki bei ki pa hap ki wow e ya u Aadhaar Number yong ki wa ka Birth Certificate ki khon ki deiwa lai cha ki Aadhaar Enrolment Centre deiwa rahlang wa i dur i khon ki wei ym emkaam wow chim ya ka Biometric Data iwa mut wow chondur yei pariam kti deilang wa i pyllung khmat i khon ki ha ini i por.
Ya ka Biometric won da hap bait wow leh deiwa chondur yei dur deilang wa chiphaw tylli ki pariam kti kamjooh ya ki pyllung khmat manda dap 5 hadooh 7 snem wei hadien won manda em ki 15 hadooh 17 snem, wei ki wym leh yeini daw chah pyndam u Aadhaar ki. Yeini da hap wow leh yow pyntikna wa da heh da saan ki khynnah yow pynsakhiat lyngba u Aadhaar.
Ka sorkar da ong ko leh wa da em ki khynnah skur ki wym em pyndep ya kani ka Biometric Update ha ki rta wa da kdaw haneiñ wei manda chah pyndam u Aadhaar ki daw chah ktah i yaleh Scholarship ki kamjooh hawa yaleh ya ki National Level Entrance Exam.
Chooh chooh da ong wa yow yaleh Aadhaar toh kawa dei mynkna neibynta waroh hanla em ha iwon iwon i rta kamjooh neibynta ki khynnah kiwa nadooh 5 hadooh 7 snem wa 15 hadooh 17 snem.
Kamtæ ka sorkar da kyntu ko ya waroh kiwa chong chnong ki wym pu em leh Aadhaar wow leh smat ki yeini wei ki bei ki pa leh toh u pynchlur ki ya ki khon ki wow leh ya ka Biometric Update manda em ki khon ki hei rta wa 5 hadooh 7 snem wei manda dap ki 15 hadooh 17 snem yow lait iwon iwon i thut.
Discussion about this post