Ka Delimitation Committee ka Jaiñtia Hills Autonomous District Council (JHADC), dadep ko wow pynbna ya ki tarik wow pynman Public Hearing ha Amlarem, Jowai wa Khliehriat yow e laad ya ki paidbah wow pynsñiaw ki yeiwa da tyrwa kammon wa da phiah wei da kyrriah ya ki chnong na kawi ka Constituency cha kawi.
Heiyatoh wa ini da pynbna kyndon ya ki paidbah wa wan cha kini ki Public Hearing wa hap ki wow bood thij.
Kini ki Public Hearing u sdang ki 11:00 waje i step khlem pynslem wei kitu kiwa kwah wow klam wow e yei pynsñiaw (Testify) hap ki wow wan e pyrtuid nadooh 10:00 waje i step hadooh 10:45 i step yong ka sngi pynman Public Hearing.
Du kitu donhi kiwa da wan e pyrtuid namo kiwa da Register u chah u klam u pynsñiaw yeiwa kwah ki.
Kini ki bru paidbah u e por 5 minit u klam ki wei lada em palat 2 ngut kiwa kwah u klam ya ka jooh ka phang, daw chah u klam 2 ngut donhi kiwa kyrchaan wa 2 ngut won kiwa pyrchah. Uwa klam nyngkong daw klam u 3 minit wei uwa klam wa ar won 2 minit wei lada chah u pyntam yei por daw chong hei rai u Chongknor.
Du ar ngut ki bru paidbah na ka jooh ka chnong u chah u klam ki katkam i por wa da kdaw haneiñ.
Da pynbait wow e laad u klam nyngkong da ki bru wa pliah wa chemphang, neitæ ki bru wa mihkhmat ya ki seiñ wei u pynbood sa ki bru samen.
Waroh kiwa wan cha ka Public Hearing toh u man ki kiwa emakor ymtoh u pynwit pynthut ki hawa klam kiwi ki bru.
I rukom pynlai yei chimbynta ki paidbah u leh da u Chongknor uwa hap pyntikna wa da bood ya ki kyndon wei lada emkaam katwa yoo toh yoo biang u wow leh.
I rai u Chongknor u man i iwa khaddooh heiyatoh wa iyi wa hoi u kylli wei kiyi ki phang wa hoi u wanrah yow yaklam kamjooh i rukom pynlai hadooh ya kiwon kiwa chah u klam wei kiwon kiwa kwah wow kylli wei ya kiwon wow e jubab.
Manda kylli toh u man ki kiwa che ki wym kyllaiñ wei kiwa yatoh wa ki bor wa da pynkup ha ka Committee.
U chah wow kylli iwi donhi da kiwon kiwon ki bru paidbah kamjooh ki seiñ iwa yatoh wa iwi i kaam tangwa lada i jubab wa e ym ye wow pynhun, daw yaleh wow e laad u kylli pynche lada kwah ki.
Hawa kylli, hawa wan e yei klam i pynsñiaw wa hawa e buit ymtoh u man deiwa kdaw wei kynthah, klam sih ya kiwon kiwon kiwa kreh ka Council næ ki MDC. Ym ye wow khana næ wow paan jubab yei wym chah u pyntip paidbah wei ymtoh u kylli yeiwa da dep kylli da kiwi.
U Chongknor daw khut u leh ya kiwon kiwa toh u klam u pynsñiaw wa kiwa kwah wow kylli.
U Chongknor daw chim u leh ya ka rai wa lada emkaam u jubab namo ym emkaam u jubab yeiwa da kylli.
Ym chah leh wow yatai nia ya iwa da kylli kamjooh yeiwa da jubab.
Puræ leh: Ki tarik pynman Public Hearing neibynta u phiah ya ki Constituency ka JHADC
Discussion about this post