Ka District Hub for Empowerment of Women (DHEW), chirup ka District Social Welfare Officer (DSWO) wa ka District School Education Officer, West Jaiñtia Hills ha ka yalang leh burom ya ka sngi wa kyrpang ki khynnah (Children’s Day) wa da pynman ha ka 12 tarik ha Auditorium ka District Library Jowai, da pynkup burom ya ki khynnah skur wa poi chakhmat wei jop hei puræ puthi, i lehke Sports wa kiwi ki de ki bynta.
Neitæ da pynkup burom leh ya ka Sawakani Lakiang kawa man kam ka Beti Bachao Beti Padhao (BBBP) Ambassador kawa da yoh yaka takma ksiar ha ka rynsan yakob Women’s Bikini Model (Pro Division) yong ka South East Asia Championship 2026 kawa da pynman ha Pattaya, Thailand.
Ha kani ka sngi u Abhinav Kumar Singh, Deputy Commissioner ka West Jaiñtia Hills District da man u kam u kongsan katwa ka Dr. Wa I Sa Sumer, District School Education Officer, WJH kam ka symbood kongsan.
U DC hawa klam da pynsñiaw u i yaroh ya ki khynnah wa ya ka Beti Bachao Beti Padhao (BBBP) Ambassador, hajrong i kreh chitom wa i man chlur yong ki.
Ong haroh u wa ki khynnah man ki kam ki moomær wa katni wa ka mynried yong ka ri, heiwa dei angnood wa i sap yong ki da e sñiawbha ki cha ka imlang sahlang.
Da e mynsiem haroh u ya ki khynnah skur ki wym pu ye u lehbha deiwa pynkynmoo wa waroh ki bru em ki jar jiar i sap wa kyrpang iwa ye u tyrchaaiñ ha jar jiar i por wa i rukom deiwa e nongmuna u na i kylla ha oo hi, kamtæ kyntu u wow nang pteiñ u kreh chitom.
Da pynkynmoo haroh u wa i stat, i chait i khiah wa i chaniah wa em haka kynthai pynkhlan ko ya ka manyung wa yaka imlang sahlang. Kamtæ khut u i yakrehlang yow pyntikna wa ki khynnah kynthai u chngaaiñ ki, u yoh ki yei puræ puthi wei u yohlaad ki wow pyndep yeiwa angnood.
Ka Dr. Wa I Sa Sumer hawa klam da e khublei ko ya ki khynnah kiwa da yoh yei burom hei puræ puthi, i lehke wa kiwi ki bynta, wei da ban joor ko hajrong i emkaam i puræ puthi yow pynku yei im ki khynnah.
Da pynsñiaw haroh ko ya ki luti wa da chim ka sorkar neibynta u pynku yei puræ puthi wa i chait i khiah yong ki khynnah nadooh ki Scheme baam ja sngi ha ki skur (Mid-Day Meal) hadooh ki laad pynroi yutip (Science), i sap chna sur wa kiwi ki sap wa emkaam hei im.
Da yoh leh ki kyntien pdiang burom wei kyntien e khublei na ka Y. Najiar, District Social Welfare Officer cum District Nodal Officer DHEW, West Jaiñtia Hills.
Ha kani ka sngi da em leh i lehke drama tbian da ka kynhun ‘Saiyeisap’ kawa da wanrah i sneiñ kyntu ha ki manbei manpa kamjooh ki khynnah skur.
Discussion about this post