theme-sticky-logo-alt
theme-logo-alt
Advertisement ad1
Advertisement ad1

Ki lehkmen Independence Day ha West Jaiñtia Hills

Advertisement ad1
Advertisement ad1

U Montri ka chnat Urban Affairs, u Sniawbhalang Dhar ynne ka sngi da pynhær u ya ka lama ka ri kam chibynta wow lehkmen ya ka sngi laitlooid wa 75 namo ka 75th Independence Day ka ri India ha ka yalang wa da pynman ha madan Jrisaleiñ, Chutwakhu, Jowai kawa da chimbynta da ki kattu katni ki heh deiwa bood ya ka kyndon yada na ka khlam COVID-19.

U Montri da e khublei u ya ki paidbah deiwa pynkynmoo ya iwa da e ki khlawait kam U Kiang Nangbah, U Tirot Singh wa U Pa Togan Sangma wei emkaam i wow e yei kreh neibynta ka ri. 

Da pynyoo u leh yei tipmit ya i kreh ki Front Line Worker wow yada COVID-19, wa kynthup ya ki Doctor, Nurse, ki pulit wa ki dkhot ki chnong kiwa da ya krehlang yow yaleh pyrchah ya u khñiang khlam. Da kyrpaad u leh ya kiwa chong chnong kiwa da dap 18 snem wow lai chim ki ya i tika.

Da khana u leh ya ki luti wa da lai da ka sorkar yow kdoh u khoom yei poor ka khlam wa kiwi de ki kaam pynroi wa kiwa yatoh waka puræ puthi.  

Da saam u leh ya ki Certificate cha ki thaw sumaar wa da leh bha ya i kaam yong ki hapoh ka District. Ya kini da jied deiwa bichaar katkam ki kyndon wa booh da ka National Health Authority (NHAI, AB-PMJAY) wa ka Nodal Agency (SNA-MHIS). Ya ka khusnaam cha ki Public Health Centre (PHC) da e cha ka Nangbah PHC wa Dawki PHC. Katwa cha ki Community Health Centre (CHC) da e cha ka Laskein CHC.

Ha kani ka sngi da yoh leh yei rwai chaphang u Kiang Nangbah wa da e da ka Ch’baeh Society for Literature Arts & Culture, Jowai wa tem wa rwai da ki dkhot ka Society wa kynthup ya u Raymond Nartiang, President, Wansalan E Dhar, Founder Secretary wa u Deiru Laloo, dkhot ka Society.

Neidaw wa em ka khlam COVID-19, ya ki paidbah da khang ya ki wow embynta lang ki ha kani ka lehkmen ha madan Jrisaleiñ.

Hachwa ini hei step, neiliang u Deputy Commissioner, u Garod LSN Dykes wa u Superintendent of Police u Bikram Marak da lai booh syntu ki ha u mot U Kiang Nangbah wa em ha Syntu Ksiar.

Ha Amlarem da lehkmen ya ka sngi laitlooid da pynman ha Syiem Jingsuk Higher Secondary School, Lai Lyngdoh deiwa emlang u Montri ka chnat Fisheries u Dasakhait Lamare uwa da pynhær ya ka lama ka ri.

Ha kani ka sngi da saam leh ya ki khusnaam cha waroh ki wakreh kam ki ASHA hapoh ka Amlarem Sub-Division. Da saam leh ya ki Certificate of Merit cha ki 3 ngut ki khynnah Class X wa 6 ngut ki khynnah Class XII (3 na Arts wa 3 na Science Stream) kiwa da lehbha ha ki Board Exam yong ki.

Da yoh leh ya ki rwai ki chaad, na ki khynnah ka Mang Hai Ryum Upper Primary School, Amlarem wa Amlarem Government L.P. School Amlarem.

Ha Hima Shangpung da lehkmen ya ka sngi laitlooid ha madan Hula Moosyiem, Shangpung heiwa u MLA ka thaaiñ u Coming One Ymbom da wan u wow pynhær ya ka lama ka ri. 

Share this:
Previous

Da pynkrehkaam da ka Total Curfew ha Shillong wa ki chnong wa marjan

Next

Thoh u Lahkmen cha u Montri Rangbah wow pynlait noh oo na ka chnat Kaam Pohyung