Uwa yahkhmat ka UDP uwa man leh u MLA na Khliehriat, u Kyrmen Shylla da ong u wa ka seiñ da pynkhreh ko neibynta ka Election MDC kawa daw man wei ka Party da e kti laitlooid ko ha kiwa yahkhmat ki District wow jied ya ki kyrtong, heiwa da khana u wa sa kattu katni ki Constituency wa ka seiñ wym pu yoh kyrtong ha Jaiñtia Hills.
U Kyrmen da kyntait u wow khana yei pyrtuid ki kyrtong wa ka Party da mut ko wow pynyieñ thymme, tangwa da ong u wa waroh 6 ngut ki MDC wa ka UDP em ko kattæ ha JHADC daw yoh Ticket ki wow yakhun biang ya ka Election.
Hawa kylli, u Kyrmen da ong u wa ka seiñ daw lai ko cha ki paidbah yow kyrpaad neibynta i kyrchaan hajrong ka yurim wa kiwa mihkhmat da kreh ki, da ong chooh chooh wa ki paidbah ha kani ka kynti ymtoh wow ap næ ngait ki du i ktien tangwa wow pait ki leh ya ki kaam wa da leh da kiwa mihkhmat hachwa wow e ya ka Vote.
Uwa yahkhmat ka UDP uwa man leh u Montri ha ka sorkar, da ong u wa ki paidbah ym jied ki ya kiwa mihkhmat wow chong ha ka Liang Pyrchah, neibhah hawa em ha ka liang synchaar em chiboon ki myntoi khamtam wow pynyoh ya ki kaam pynroi.
Discussion about this post