Jowai: Ka Jaiñtia Hills Autonomous District Council (JHADC) toh ka stieh wada pynkup bor wow yada yaka jaitbru heiyatoh wa i khyndaw i chyiap i riti dustur wei em ko leh ka yong ka hi ka Dorbar neibynta u yatai yachem yumut yaki kaam ka Council la heiyatoh wa i eh i khoo næ u nangkyntu kynrong chooh chooh yaka, tangwa ha kini ki sngi won ki MDC wa mihkhmat cha kani ka yung dorbar toh kiwa du i naam MDC khlem leh iyi iyi neibynta i bha i miat ka Council waka Ri-loom Jaiñtia hi waroh kawi. Ong u S. Mulieh u CEM warim ka JHADC hawa yaklam wa kiwa thoh khubor.
Ong u wa i yong sakhiat hi da yoo wa ha kini ki sngi yaka dorbar yong ka Council da pynkut du hapoh chi kynta ar kynta, heiwa ki MDC wada phah da u paidbah cha ka yung dorbar chna aiñ ka JHADC wym em ki yei sñiawthooh hajrong wow yaklam yei emkaam ka Council, neibhah da yoo wa wym jooh em i yaklam, i yachem yumut hapoh ka Council.
Da pynrap haroh u wa wot yaka dorbar mang tyngka dang em i por wa kut ko du hapoh 15-20 minit. Da pynsñiaw u i phylla wa kammon kat yaka mang tyngka kawa daki klur klur leh da mynjur khlem i ya phyllu yumut hapyrdi ki para dkhot, kammon wow ye ki u pynlai yaka District Council hawa ka dorbar wym yoo em yurim de wow ong ka dorbar.
“Hei por yong i wym jooh pynwai dorbar khlem da pyndep yei yatai nia neibynta i bha i miat ka Council, heiwa da pyndep nadooh ki Motion Resolution, i jubab yeiwa kylli deiwa yatai nia bha hajrong kammon u pynkrehkaam neibynta u pynlai bait yaka Council wei kamjooh kammon u ye wow pynmih poisa”. Ong u S. Mulieh.
Tangwa ki MDC katni wot kiwa chong haka chuki leh wym nud ki u yaklam, man MDC ki du u chna poisa haka Budget khlem i yatai won wa kammon u pynku yaka yarong poisa ka Council, neibhah emkaam bha wow pynmih poisa, wei kam kiwa mihkhmat toh u yaklam bha ki neibynta ka imlang sahlang wa i emkaam ka Council.
Da kynnoh haroh u wa wot kani ka Executive Committee wa katni wa yahkhmat da u Thombor Shiwat kam u CEM leh man ko kamjooh hi, heiwa boon hi wym nood ki u yaklam hapoh ka dorbar wym tip neiyi i daw. Tip bha hi ki leh yei emkaam tangwa wym bien ki u leh, pynkut u S. Mulieh.
