Ka seiñ wa tip kam ka Movement for Change Meghalaya India, katkam ka kyrwoh wa da phah da u President, u Pherdian Samaiang wa u Chandame Sungoh kam uwa e ktien da beiñ ki yaka sorkar MDA-II wa yahkhmat da ka NPP hapoh u Conrad Sangma kam u Montri Rangbah hajrong i chah pyndam kreh chiteiñ por wei khlem yurim ya ki Officer ka Lokayukta.
Ka seiñ da ong ko wa ini toh i buit yong u Conrad Sangma khnang wow yada ya kiwa ha-yung ha-sem u kiwa da chah Charge Sheet neidaw i baam tooh wa chyrkhei yong ki hapoh ka Garo Hills Autonomous District Councils.
Ka sorkar da pynche ko yeini wa da leh ko toh katkam ka aiñ Lokayukta Act neibhah wym chah wow em ki Officer kam ki dkhot da kiwa da chong-ngiah wei deiwa thung da ki Officer kiwa dang kreh yow pynduna leh yei lutphut ka sorkar.
Ka seiñ da ong ko wa ini toh iwa bakla neibhah ka aiñ ym em ong ko wym chah u thung da ki Officer kiwa da chong-ngiah, kamtæ da ong wa ini toh du i pynbiej paidbah neibhah ka sorkar thung ko ya ki Officer kiwa da chong-ngiah ha kiwa boon ki chnat hadooh wow man kam kiwa e buit wei da thung leh hadooh ki MLA wa rem Election.
Lada thung da ki Officer kiwa dang em hei kaam ym man ki kiwa laitlooid wow kylli wei takit neidaw wa hap ki wow tieñ wei kohngooh ya kiwa em haneiñ yong ki.
Ka seiñ da beiñ ko leh yei pynkrehkaam ki bor District ka East Khasi Hills wa khlem chong ñia yaka Section 144 CrPC heipor wa ka VPP mut ko wow yakhi deiwa jai jai hajrong ini i kaam.
Da ong leh wa ka Section 144 ymtoh ka aiñ wow khang yei yalang paidbah kiwa yakhih da ka luti ka aiñ. Ka Section 144 ymtoh wow pynkrehkaam hawa wan ki heh ki haaiñ. I pynkrehkaam yaka Section 144 toh du i kohngooh yong ki DC wa Magistrate yeiwa ong ka sorkar. Hei yong sakhiat kam ki DC ki Magistrate ki IAS ,IPS toh u em ki hapyrdi, ki wym leh chiliang ya kiwon kiwon, tangwa iwa sñiawsih toh wa boon na ki DC, ki Magistrate kiwa kohngooh ha ki blai san snem khlem da ksoh ki yaka kyrdan wa i bor wa pynkup ha ki.
Discussion about this post