U National President ka National People’s Party (NPP), u Conrad Kongal Sangma da ong u wa ya ki MLA da jied da kiwa chong chnong yong jar jiar ki Constituency wei toh ka rai yong ki paidbah, wei ki MLA daw chim ki ya ka rai won ya uwon wow kyrchaan, deiwa pynrap wa ki seiñbhalang ye ki wow em ka sñiawkhia wa ki phang kiwa yatoh wa ka rai wa da dep na ka Election.
Hawa yatoh wa i phah yong ka HSPDP ya ka chithi wym embynta wow kyrchaan ya ka NPP wow chna sorkar, uwa yahkhmat ka NPP uwa da ong u wa toh ka Legislature Party kawa kyrchaan wow chna sorkar wei waroh 2 ngut ki MLA da dep ki wow soi ya ka chithi wa kyrchaan ki.
Ha iwi won i liang, u Conrad da pyntikna u wa i chim smai yong ka sorkar wa thymme u man ko ha ka 7 tarik uni u bnai ha pchem ka yung sah u Lat ka jylla, wei da ong u leh wa ha katai ka sngi da yooluti wa u Prime Minister, Narendra Modi wa u Home Minister, u Amit Shah leh u ya emlang ki. Da khana u leh wa kamwa man katni da em 32 ngut ki MLA kiwa kyrchaan ya ka sorkar wa thymme.
Hawa yatoh wa ka khubor wa em kiwi ki Party kiwa da yaklam wow chna sorkar lang, u Conrad da ong u wa i sakhiat tangwa da kyntait u wow khana iyi hawa yatoh wa kitæ ki seiñ saiñpyrthai.
