Shillong: U President ka United Democratic Party (UDP), u Dr. Donkupar Roy da ong u wa ym em kitæ ki blang rong yong tangwa du kiwa lieh ha ka yalap Election MP ya u kyrtong monlang ka MDA, u Dr. Jemino Mawthoh uwa da chah pynrem noh ha u kyrtong ka Congress hadooh palat chi lak chiteiñ Vote.
Hawa yaklam ynne ka sngi u Dr. Donkupar da ong u wa nadooh wa sdang wow lai lyngba ya ka MP Election ha u snem 1989, nadooh kitai ki por ki seiñ ri-loom ym jooh jop ki neidaw ki daw wa boon. Da ong u wa iwi na ki daw toh wa ki paidbah ha ri-loom Khasi-Jaiñtia pyrkhat ki wa lada phah da ki ri-loom u lai yakreh lang bait ki wa ki seiñ heh ha Delhi, iwa pynman ya ki paidbah wow phah bait da ki National Party wei ini i rukom pyrkhat ki paidbah dang pteiñ i hadooh katni.
Hajrong i chah pynrem u kyrtong ka UDP ha kani ka Election MP wa dang dep na Shillong Parliamentary Constituency, u Dr. Don da ong u wa ki paidbah sñiaw ki wa lada phah da ka National Party daw rap miat i neibhah wa da em lok chwa ki ha Delhi.
Heijooh i por da ong u wa iwi i daw wa ki paidbah tieñ dooh ki toh ya ka BJP kawa thmu wow wanrah biang ya ka CAB, kawa da pynman ya ka Congress wow yoh kabu na ki paidbah ha kani ka Election.
U Dr. Don da kubur u leh wa ka Party kamjooh ka MDA ymye ko wow kdoh næ pynsñiawthooh ya ki paidbah hajrong kani ka bynta.
Da ong chooh chooh u wa ka Result MP ym em bynta ko wa kiwi kiwi ki Election ha ka jylla, deiwa kam wa ki seiñ ri-loom da rap khlan ki katni heiwa da yoh ki boon ki Vote iwa pynyoo wa ki paidbah da chaniah ki ya ki seiñ ri-loom.
Discussion about this post