Shillong: U Montri Rangbah ka jylla u Dr. Mukul Sangma da ong u wa lada e laad ya ki liang pyrchah wow yahkhmat ki ha ka synchaar ha ka jylla, ka jylla Meghalaya daw uiñ biang ko chadien ha u snem 2010 heiwa ki seiñ kieñ suloi daw yieñ biang ki wei ki yakhih yong ki seiñbhalang daw joor biang ki kawa ktah joor ya ka chongsuk chongsaiñ.
Hawa khana u ya iwa jop i krehkaam ka sorkar hapoh i yahkhmat ka Congress wei hapoh i yahkhmat yong oo kam u Montri Rangbah ka jylla, U Dr. Mukul da ong wa ini man ka jylla katni toh neidaw wa ka sorkar booh ko ya ki paidbah, ki seiñbhalang, ki seiñ kreh monsñiawbha ha khmat dooh hajrong iwon iwon ki kaam wa kongsan.
Da pynbaad u leh wa ka sorkar pyrdi ym ye ko u pynbha pynmiat ya ki sarok wa ki sarok bah, ki sarok wa da sih hapoh ka jylla lada ym em i suk wei emkaam u kynmoo yeitæ.
Da beiñ u leh ya ka liang pyrchah kiwa ong wa sih ki sarok deiwa ong “Lai cha Dawki wei kylli toh ka sarok yong kiyi ymtoh ka mo ka National Highway tangwa waroh ood ki wei pynbudnaam ki yei sih ka sarok ym toh dei wym tip ki ka sarok toh yong kiyi.”
Da pteiñ u deiwa ong wa ki paidbah ymtoh u tlep ki yei sakhiat toh u thooh bniah ki yow tip ki wow leh yeiwa emkaam.
Da ong u wa ka sorkar ym iehbeiñ ko ya kiwon kiwon ki sarok wa da chna hi da ka sorkar jylla wei em leh ki sarok wa ka sorkar jylla u pait hi ko kam ki State Highway neibhah kwah ko wow pynman ya ki kam ki nongmuna ya ka sorkar India wa ya ki sarok ym toh kamwa iehbeiñ da ka sorkar India.
Da ong u leh wa katni aw jan waroh ki surok ha ka jylla kiwa pait da ka sorkar jylla toh kiwa bha suda wei ka jylla hi u man ko kam ka jylla wa bha sarok tam.
Discussion about this post