Hadien wa u Symbood Montri Rangbah ka jylla, u Prestone Tynsong da ong u wa ki Scheme wa tyrwa ka TMC neibynta wow thap, wow e poisa cha ki manbei wa ki khynroo khyllood T. 1,000 man-u-bnai toh kiwa daw hap wow dai ya ka jylla Meghalaya, neiliang u heh ka TMC uwa man leh u Parliamentary Secretary ka Party kamjooh leh u MP ka Rajya Sabha, u Derek O’Brien da ong u wa lada em wa sñiaw toh wa kini ki Scheme toh ki wow dai ya ka jylla pynyoo i wa chibhah wei ki paidbah leh da dai ki ka neibhah manda man ki kam ki MLA da man ki leh kam kiwa dai mar (Salesman).
Hajrong ini da ban joor u leh wa lada toh iwa e ya ki paidbah tæ iyi i wit hajrong itæ neibhah ha kiwi ki jylla ka wa synchaar ka TMC da yoh khusnaam (Award) na ka United Nations na ki Scheme wa ki kaam wa da pynkreh wei katkam wa man katni kiwi ki jylla da bood ki ya ki Scheme wa da sdang da ka TMC iwa man iwa bha deiwa e nongmuna ya ka Health Card kawa da sdang na kawi na ki jylla ha thaaiñ mihsngi ka ri.
Hawa yaklam wa kiwa thoh khubor hadien wa kut ka yalang na Iawmusiang da ong u wa ka bru wa sdang ya ka TMC kawa da man kawa mihkhmat ha kiwa boon ki yung dorbar chna aiñ ha jylla West Bengal wa ka ri, sah ko ha i yung iwa khian bha.
Heiyatoh wa i pynkrehkaam ya ka ILP da ong u wa u ym randien ki katkam wa angnood ki paidbah ka jylla deiwa ban leh wa ymtieñ ki ya ka BJP wa pynyoo bor da ki CBI wa ED wei yeini waroh toh wa da leh da ki seiñ ha ka jylla kiwa da krehlang wa ka BJP kiwa paan kyrchaan da ini i rukom.
Chooh chooh da ong u wa ka TMC toh kawa da yah katkam ka thaaiñ wei ym em i phah kmai namo dei lehbor wei katni ngait skem u wa ka poisa ymye ko wow jop yei mynsien bru wei ngaitskem u leh wa da em u bru uwa miat tam wow chakri ya ki paidbah ka Constituency.
Da ngait u leh wa ki paidbah ka Jowai wa kamjooh ki paidbah ka Ri-loom Khasi wa Ri-Loom Garo kwah ki yei kylla.
Hawa kylli won wa ka TMC man ko ka Party wa dang thymme ha ka jylla, da ong u wa u PA Sangma nachwa jooh man u kam u MP ka TMC wei sñiawkmen u wow ap ya ka la’ær ha ka jylla.
