Jowai: Ka Inter School Football Cup 2017, West Jaiñtia Hills District kawa sdang nadooh ka 23 tarik u bnai wa da dep heiwa ki yakhun da yabhah ha ki le tylli ki bynta ka U-17 Boys heiwa da wan chimbynta 36 tylli ki dhab, ka U-17 Girls wa em 18 tylli ki dhab wa ka U-14 Boys wa em 20 tylli ki dhab da sdang ko u poi cha ka yakhun Quarter Final.
Ha ka kyrdan U-17 Boys ki dhab wa da yoh u psiah cha ka Quarter Final toh ka Ri-War Jaiñtia Church of God, Amlarem, ka Jowai Presbyterian HS School, Jowai, ka Marian Hill HS School, Jowai, ka Little Flower HS School, Ummulong, ka St. Dominic HS School, Mookyndeng, ka JNV School, Mukhla, ka Saw Lyngdoh HS School, Mowkaiaw wa ka North Liberty HS School, Jowai.
Ha ka kyrdan U-14 Boys won kiwa da yoh u psiah Quarter Final toh ka Marian Hill HS School, ka North Liberty Higher Secondary School, ka St. Dominic HS School, Mookyndeng wa ka HK Singh Memorial School wei ki yakhun wow psiah Quarter Final ha kani ka kyrdan dang pteiñ ki wei ya ki yakhun Quarter Final won u sdang nadooh ka 6 tarik uni u bnai.
Ha ka kyrdan ki U-17 Girls won ympu em wa yoh u psiah Quarter Final.
Ynne ka sngi ka yakhun ha ka U-14 Boys da pynman hapyrdi ka HK Singh Memorial School pyrchah ya ka Ladthadlaboh UP School heiwa ka HK Singh da jop ko da 6-0. Ha ka yakhun wa bood won ka North Liberty da pynrem ko ya ka J.N.M Secondary School, Lamin da 2-0. Ka Government Boys’ HS School won da pynrem ko ya ka Mootyrshiah Secondary School da 5-0.
Ha ka kyrdan ka U-17 Girls won ka North Liberty da pynrem ko ya ka Mihmyntdu R.C. Evening School da 3-2 lynga ka yachut Tie-Breaker. Ka Ummulong Presbyterian HS School won da pynrem ko ya ka Jaiñtia HS School da 1-0.
Discussion about this post