Jowai: U MLA ka 2-Jowai Constituency u Wailadmiki Shylla ynne ka sngi hadien wa chah ktah ki thaw rep yong ki bru ha u slap wa ka la’ær ha kini ki tayaw wa dadep wei i em ka khlam u COVID-19 da chimkhia u wow khut ya ka yalang hapyrdi ki sahep sorkar wow pynbiang yeiwa emkaam ki warep.
Ynne ka sngi ha kani ka yalang da emlang ka BDO la Block, ka B. Blah, ki sahep na ka chnat i rep i riang ki MDC wa kiwi kiwi.
Neiliang u Wailadmiki Shylla hadien ka yalang da kyntu u ya ki VEC waphær waphær wow chim kabu ki ya ka Land Development Scheme lyngba ka Scheme 100 sngi namo ka MGNREGA wow chna pynmiat ya ki thaw rep yong ki kiwa da chah ktah ha u slap wa ka la’ær.
Da kyntu u leh ya kiwa kitkaam chnong wow yachem ya ki BDO wa ki Gram Savak wow leh yeiwa emkaam wow pynsmat u pynpoi yarap cha ki paidbah.
Da ong u leh wa hapoh ka Scheme 100 sngi da em leh ka Land Development Scheme kawa da yarap ya ki paidbah ha ki chnong ha kiwa boon ki liang wei lyngba kani daw ye u e yarap ya ki ha ki bynta wa chah ktah ki.
Da kyntu u leh ya ki warep wa katkam wa man, neiliang ka chnat Agriculture katkam wa kyntu u ya u montri ka chnat rep i riang ka jylla, u Banteidor Lyndoh da kular u wow e yarap ya ki symbe cha ki warep wa chah ktah ha u slap ka la’ær neipor da dadep.
U Wailadmiki da kyntu u ya ki warep wow thoh kot ki cha ki sahep sorkar wow yoh yarap khamtam ha u symbe heini i por wa da toh u thung ki ha ki hali yong ki.
Da kyntu u leh ya ki wow leh ki yeini hapoh 2 tayaw khnang wa ka yung krehkaam u leh ko wow leh yeiwa emkaam.
