U Montri wa pait ya ka chnat yalehke ha ka jylla, u Banteidor Lyngdoh da pyntip u wa ka sorkar dadep booh mooyurim ko neibynta wow chna pynthymme ya ka JN Complex kawa em ha Polo, Shillong.
Kam wow kdaw heini wa da mih i pynbaad hadien wa yoo lyngba ka Social Media yeiwa leh khiar ki kari ki heh sorkar wa kynthup ya ki Montri ya ka madan yaleh Football wa kamjooh ka madan yamær pyllah yong ka JN Stadium, Polo ha ka 21 tarik uni u bnai wa da pynman ya i lehkmen dap 50 snem ka jylla.
Neiliang u Banteidor da ong u wa ki paidbah ki wym tip tæ em i hok wow pynbaad, tangwa ka sorkar da booh ko wow pynmiat noh ya kani ka madan JN Complex heiwa da mang hadooh T. 34 klur wow kyrriah noh ya u phlang Plastic (Artificial Turf) wei wow thung noh da u phlang wa sakhiat (Natural), wow pynmiat ya ki thaw chongke, ki thaw rieh slap, thaw khreh kiwa yalehke wa kamjooh ka madan yamær pyllah.
Heiyatoh wa i pynman ya ka lehkmen Meghalaya Day ha kani ka madan, da ong u wa da em chwa i pynbait nachwa wow sdang i kreh mar kut ka lehkmen wei neini i daw da rai wow lehkmen bait ya ka ha kani ka madan wei ym em i thmu wow pynsih.
Da pyntip u wa ya u phlang Plastic uwa em katni da kut i por yong oo, wei neiliang ka chnat ym pynsepai ko oo, wei daw pynemkaam ko ha kiwi ki bynta wow myntoi ki khynnah yalehke.
