Ka HNLC ha ka kyrwoh wa da phah da u General Secretary, u Saiñkupar Nongtraw, da chim ko yei kitkhlieh yei booh ya u Bomb IED ha yung u Nehlang Lyngdoh wa em ha Umsning, Ri-Bhoi District kam ka dak wow pynyoo yei pyrchah yei pteiñ i chah chetkylla ka jatbru ha ki Politician wa ki Businessman kiwa pteiñ wow yada ya ki dkhar deiwa khlem da pyrkhat de yeiwa emkaam ki jaitbru yong i.
Ka HNLC da ong ko wa ini toh wow pynkynmoo ya waroh kiwa mihkhat kattæ kamjooh ki warim kiwa da chaniah ki paidbah wei ini ymtoh i hok yong ki wow dai wow thied ki neibhah i kaamram yong waroh kiwa mihkhmat toh wow yada yei thaw ki bhaw, i khyndaw u chyiap, i naam i pyrtuid ka jaitbru ymtoh wow chimkabu yow yoh myntoi samen.
Ka seiñ da ong ko wa da yoo ko ya kitu kiwa pynemkaam bakla yei bor wow yada ya ki dkhar hadooh wow pynyoh thaw pynyoh bhaw ya ki wei ini da man ko i chetkylla ya ka jaitbru.
Da maham leh wow sai pyrthai ya waroh ki kaam baamtooh deilang i pyrtuid kitu kiwa ya ksohktilang wa kiwa na baar.
Ka seiñ da ong ko wa u 2004, chityaaw chwa wow tympdung Bomb ha Them Metor, da booh ki ya uwi u IED ha SP Office Shillong khlem da tympdung oo wei ki pulit da murieh ki yeini khlem da pyntip neidaw wa sarom ki.
Ha u 2021 da tympdung Bomb ki ha Khliehriat Police Reserve heiwa da em kiwa yap ki pulit tangwa yeini leh da murieh na ki paidbah, da kam ka seiñ.
Kamtæ da ong wa ini toh i pynkynmoo wa khaddooh ya kitu kiwa yachah ya kiwa na baar wei kiwa pteiñ u leh kamni daw dooh ki yei hok wow man kam kiwa yahkhmat paidbah wei ka HNLC em ko i bor wow yaleh wa kitu kiwa pyrkhat yei yong ki donhi samen lada em ki hei bor næ lada ym em ki hei bor leh.
Discussion about this post