Ka Secretary In-charge ka Indian Youth Congress (IYC), ka Sarifa Rahman ynne ka sngi da ong ko wa kitu kiwa mih na ka Congress toh kiwa pyrkhat yei myntoi samen donhi.
“Ym em pyrkhat ki neibynta ka seiñ, u ong O kamtæ. Ka Party da e ko chiboon cha ki, tangwa neidaw wa rap tlot ka Party katni, heithaw wow kyrchaan, da lai ksohkti lang phi wa kiwi ki Party, ini toh wa khwan phi wa pyrkhat phi du yei yong samen donhi,” da ong ka Rahman hawa yaklam wa ki thoh khubor ha Congress Bhavan.
Da yaroh ko leh ya u Meghalaya Pradesh Congress Committee (MPCC) President, u Vincent H. Pala, deiwa ong wa ka Party katni em ko ha ki kti u bru wa biang hapoh ka jylla wei daw khai-im biang ko wei daw yoh biang u chna sorkar.
Hawa kylli yei duna ki khynroo wa da yoo hapoh ka Congress, ka Rahman da ong ko wa neidaw wa em ki kyndon yada COVID-19.
“Ym chah wow pynman ya ki yalang paidbah lane ki yalang pynyoo yei pyrchah. Da pynman i leh ya ka pynpsiah dkhot du lyngba ka Online donhi yow lait nei yalang wei yachem para bru,” da pynche ko.
Katkam wa ong ko, neidaw wa em u COVID-19 ye u man wym yoo ya ki khynroo ka Congress tangwa em ki ha kylleiñ kylleiñ.
“Kattæ da em ka Election chiteiñ samoi, ki bru yong i da kreh chitom ki ha waroh ki Constituency. Ha kini ki thaw daw yoo phi ya ki dkhot wa kreh ki,” da ong chooh chooh ka Rahman.
Heiyatoh wa ka Youth Membership Drive, da ong ko wa ini toh ya ki khynroo wa em 18-35 snem i rta wa ye ki wow psiah chapoh ka Party.
Da pyntip leh wa neibynta ini da em ka ‘IYC App’ kawa ye u yoh na ka Play Store.
