U Symbood Montri Rangbah ka jylla uwa pait leh ya ka chnat Labour, u Prestone Tynsong da klam che u hapoh ka Yung Dorbar Mang Tangka ynne ka sngi wa kiwa mylla baar jylla ym emkaam de ki wow yoh No Objection Certificate næ i tipmit na ki Autonomous District Council (ADC).
Hawa pynche hajrong i yatai ha ka ‘Zero Hour’ wa da wanrah da u MLA ka Congress na Mawlai, u Process T Sawkmie, neiliang u Prestone da ong u wa ka sorkar jylla da wanrah ko ya ka Meghalaya Identification, Registration (Safety & Security) of Migrant Workers Act, 2020, wei hadien wa ka sorkar da wanrah ko ya kani ka aiñ, ym emkaam de wow chim ya ki NOC na ki District Council.
Katkam wa pyntip u Montri, neibynta wow pynpsiah pyrtuid ya kiwa mylla baar jylla, hap wow su T. 50 samen wei ka License daw krehkaam ko du neibynta 179 sngi, wei da phah leh wa ki Contractor u hap ki wow pynthymme ya ki License yong kiwa mylla 30 sngi chwa wow kut ka License.
U Symbood Montri Rangbah da ong u wa ka chnat Labour ka em ko ya ki bru, heiwa ha ki 39 tylli ki C&RD Block da booh ya ki Labour Inspector, lait noh ya ki Block wa dang dep chna thymme kiwa em 7 tylli, wei neiliang yong ka sorkar daw thung noh ko leh ya ki Labour Inspector yow pyndap lut ya waroh 46 tylli ki C&RD Block hapoh ka jylla.
Da pyntip chooh chooh u wa i kaam yong kini ki Labour Inspector toh wa hap ki wow lai pait cha ki thaw wa pynman kreh wei hap ki wow pynman yei pynsñiawthooh paidbah deiwa ya krehlang wa kiwa pynlai chnong, heiwa da ong u wa ka chnat daw pynman ko leh ya ka Workshop wow pynbait da ki Deputy Labour Commissioner ha waroh ki District yow pynsñiawthooh yei pynpsiah pyrtuid ya kiwa mylla baar jylla.
U Prestone da ong u leh wa neibynta i chngaaiñ kiwa mylla, ka chnat da hap ko wow ya krehlang wa ki dorbar chnong, kiwa synchaar chnong, wei da pyntikna u leh wa ka aiñ u krehkaam ko waroh 24 kynta, heiwa da kyntu ya waroh kiwa pynkreh næ ki Contractor wa toh u pynbiang ya ki kot ki sla wow pynpsiah pyrtuid lyngba Online/Offline, wei ya ki wym leh, daw pynshitom katkam ki kyndon yong ka aiñ.
Hachwa ya ini, hawa wanrah ya i yatai, u Process da paan u yei pynche hajrong i klam u CEM ka KHADC, wa kiwa mylla baar jylla hap ki wow yow yei tipmit na ka Council hanla da yoh ya ki Labour License, wei da paan yutip u leh yei em ki Labour Inspector ha ka chnat.
U MLA da kyntu u leh ya ka sorkar wa toh u phah ya ki Contractor wa kiwa pynkreh wa toh u pyrkhat chwa ya ki tre jylla hawa pynkreh ya iwon iwon i kaam, neibhah wa kiwa boon kiwa mylla napoh ka jylla kiwa ye u kreh ya ki kaam waphær waphær.
