U Conrad Kongal Sangma da ong u wa kam u Montri Rangbah em u chiboon ki kaam wow pyndep wei kamjooh i bahkhlieh, wei da ong u leh wa neiyi i daw wa wa ki bru kwah ki wow pynbaad wei wow wohnia khlemkaam, khamtam ha ini i por wa dang yaklam pynbait ya u pood.
Hadien wa chem wa chah ktah u ha u COVID-19 ha ka 21 tarik uni u bnai, da mih leh i pynbaad tyngkheiñ kyndon (SOP) yada COVID neibhah da lai kreh u ha ka 25 tarik wei da chimbynta u leh ha ka lehkmen Republic Day ynnin ka 26 tarik.
Hawa yaklam wa kiwa pathai khubor ynne ka sngi, u Conrad da ong u wa kitu ki bru kiwa pynbaad pyrchah ya oo, boi ym emkaam de ki deiwi tawon wow leh, neibhah kam u Montri Rangbah em u chiboon ki kaam wow pyndep.
Da pynrap u leh deiwa ong wa da syndong bha u heiyatoh wa i sumaar wei wow yada ba u COVID, neibhah hadien wa ym sñiaw chait u ha ka 21 tarik da rai u wow dam chwa u chimbynta ha ka lehkmen dap 50 snem ka jylla khlem da chim kabu wow lai bait cha ka lehkmen.
